Mizoram sorkar, Anti-Corruption Bureau (ACB) leh Central Bureau of Investigation (CBI) Academy tangrual ten an buatsaih, Anti-corruption Laws & Investigation training chu vawiin khan neih tan a ni a. Training hawnna function, Police Headquarters Arya Mess-a neih chu Chief Secretary Pu Vanhela Pachuau, Chief Villigance Officer ni bawk chuan a hmanpui.

Ni 4 awh tur he training ah hian CBI Academy, Ghaziabad atangin eiruk hnuchhui lama mithiam, R.P.Kaushal S.P leh J.C.Kaushal, Inspector ten anti-corruption Dan te leh corruption chhuina, a bikin sorkar hnaa thuneihna hman sual chungchang te, mahni hlawh phu lova in leh lo din, sum leh pai ngah leh thamna la thinte chhui chhuah dan leh thanga awhtir dan tur an zirtir dawn a ni.

Hawnna thuchah sawiin Pu Vanhela chuan India ram state dangte ang bawkin Mizoram chu eiruk leh hlemhletna kawngah a fihlim bik lo, a ti a. State sorkar sum hmuh zawng zawng 90% chu central sorkar atanga dawn a nih thu sawiin hei hi dik tak leh tangkai taka hman a ni lo fo, a ti bawk. Pu Vanhela chuan sorkar officer ten dan an hriat tawk loh leh an zawm that loh thu sawiin sorkar officer ten an in leh lo, leh thil neih hlut zawng dik tak, sorkar hnenah an report ngai lo tih a sawi a. Property return hi sorkar officer ten an ngaih pawimawh theih nan hemi tel lo chuan an ACR thlenga hrek turin khauh taka dan kalpui a nih tur thu a sawi a. Hei hi officer te tihthaihna tur ni lovin, fimkhur tura infuihna leh dan zah tura inzirtirna tur zawk a ni, a ti. Sorkara eiruk leh hlemhletna a hluar lutukna hmunah chuan mipui pawhin pawisak an nei lo mai thin, tiin Pu Vanhela chuan Anti-Corruption Bureau chu chak zawka hna thawk thei turin sorkarin thuam chhoh a tum tih a tarlang a. Eirukna hi a bul te atanga rawt chhum a nih loh chuan Mizoram hmabak chu a thim hle dawn a ni, a ti a. Police Officer te chu hlawk taka an training neih chu chhawr tangkai tura fuihin mahni tan leh Mizoram mipuite tan sorkar thianghlim nei tura thawhpui ah a sawm a ni.

Training hawnna inkhawm hi ACB Director Pu P.Kamraj in a kaihruai a. CBI S.P R.P Kaushal pawhin thusawina hun a hmang bawk a ni. Hetiang training hi Mizorama a vawi khatna niin Mizoram hmun hrang hrang atangin Police officer 26 ten training hi an nei dawn a ni.