Tun Sawrkar hian eiru leh sawrkar hnathawk dan bawhchhia te a dim loh thu leh eirukna thila inhnamhnawih ni a  puh finfiah tawh te hrem an nih tawh thu PWD Minister Pu Lal Thanzara chuan  Chaltlang Tourist Lodge ah Mizoram Engineering Service Association (MESA) Conference vawi 35-na  a hmanpui na ah Conference chhimtu Engineer kalkhawm te hnen ah a sawi.

Engineering Department hrang hrang kaltlanga sawrkar hmalakna te leh hlawhtlinna te sawiin heng hlawhtlinna liantham tak tak te hi mi tlem te in an hmuh duhlo thin a. Thil pawitak chu heng mi tlemte sawrkar kalh zawnga thuziah leh thehdarh ching te hian ring takin mipui hruaikawi zawngin an au chhuahpui thin hi a ni a ti. PWD Minister Pu Lal Thanzara chuan sawrkar in mipui tan a thaber duhsakin mithiam te rawn hmasa in a zirchian hnu ah  thutlukna harsa tak  tak a siam thin a. Sawrkar in thil thar a kalpui te hi a tha lo a nih a tih chuan a ti tawp leh mai dawn a, a thawk a phit a sawrkar thil tih hrim hrim nasa taka dodal chiam zel hi thil lungchhiat thlak tak a ni a ti.

Engineer te chu hmasawnna ruhrel satu leh remkhawm tute an ni a, an inpekna hniam leh san dan azir in ramhmasawnna a chak in a chaklo bawk thin a. An thawhthat duh dan leh an inpek dan  azir in hna a that theih bakah a chhe thin bawk a ti. Tun sawrkar chuan engineer emaw sawrkar hnathawk dang te zinga eirukna thila mawhphuh te chu an thiltihsual mawhpuhna ah thiamloh an chan phawtchuan dim miah lovin suspend an nih hnuah a hrem zui thin a. Corruption a inhnamhnawih te hi sawrkar in a tanpui reng reng lova a hrem thin zawk a ni a ti a. Hetih lai hian thahnem ngai taka thawk itsikna avanga eirulkna thila mawhpuh te hi finfiah an nih hma chuan sawrkar in a hrem a thei ngawt lova. Hnathawktha diklo taka eirukna thila mawhpuh te chu sawrkar pawh in a hnathawk an nih angin an thlavang hauhsak zel a tum a ni a ti. Hrechiang si lo, zawtchiang duhlo leh finfiahna neilova midang chhiatna tur ngaihtuah ching te hi chanchinbu leh social media huang hrang hranga ziak taima em em an nit e hi hnam anga kan rilru put hmang fuh lo siam that ngai a ni a ti.

Engineer te chu an project reng reng a hunbi tiam chhunga zawh hman a nih theih nan bul tan hma thin tur leh awmze nei lova tei khawmuang lo turin a chah a. Mizoram ah hmundang aia nep chuanglo engineer rual an awm lain contractors rintlak leh hnathawk tha duh an tlem tih a sawi a. Kan contractor te pawh pawnlam contractor te aia duhsak an phu kan tih rualin hnamdang contractor te neih ang khawl leh hmanrua neih an tum thin loh avangin Ministry of Road Transport, National Highways, etc., duhdan an pha thin lo a ni a ti. Contractors te inenfiah an ngaia an hmanrua leh bungraw neih te an tihchangtlun phawt chuan pawnlam contractors te aiin Mizoram sik leh sa bakah ram hmelhmang an hriatchian zawk avangin an hna a tha zawk ngei ang tih chu sawrkar rilru put dan a ni a ti.

MESA ah hian Engineering Department hrang hrang leh Department thenkhat engineer chhawrna a Engineer te intelkhawm a ni a. An conference ah hian an member 376 atangin Engineer  210 an rawn tel thei a. Conference hun hawnna programme hi Er. Vanlal Tlana, President, MESA in a kaihruai a. He hunah hian member thar lawmluhna, member pension ta te thlahna, MESA Constitution  thar khuallian release tir na  hun leh an pawl puala report hrang hrang ngaihthlakna hun hman a ni a. An Sr Adviser  pahnih  Er. C.L.Thangliana leh Er.L.Pachuau te bakah Er.Boman, Vice President, MESA ten thusawina hun an hmang a. Chawhnu session ah hruaitu thar thlanna hun an hmang nghal bawk a ni.