No.2322/2021-2022

Aizawl the 24th September 2021: Vawiin chawhma khan hrileng avanga eizawnna kawnga harsatna tawk mek ten eizawn nana thiam thil nghet an neih theih nan Mizoram Youth Commission kaltlanga ‘Skill Development Training’ buatsaih dan tur relin Core Committee on Skill Development, Kolasib District chuan thutkhawmna hun an hmang a, Pu Lallawmawm, Additional DC chuan he thutkhawmna hun hi a kaihruai a ni.

Skill Development Training hi thuang thum a kalpui tur a ni dawn a, Cement Mistiri, Piggery leh Bakery-ahte training hi buatsaih a ni dawn a ni. Cement Mistiri training tur hian mi 40 tan ni 45 chhung inzirtirna kalpui tur a ni ang a, Piggery-ah mi 20 tan ni 15 chhung leh Bakery-ah mi 20 tan ni 60 chhung zirtirna pek an ni dawn bawk a ni. Mizoram youth Commission hnuai a Kolasib district chhunga Skill Development Training-a tel zawng zawngte hi Certificate bakah hnathawhna hmanrua pek an ni bawk ang a, training chhung hian stipend pek vek an ni dawn bawk a ni. Training hi thutkhawmna chuan ni 4, October 2021 atanga neih tan tur a rel in training hawnna hun hi I&PR Conference Hall, Project Vengah buatsaih tur a rel a ni bawk a ni.