No.2321/2021-2022

Aizawl, the 24th September, 2021: Nimin chawhnu dar 1:00 khan Pu C.C. Lalchhuangkima, Deputy Commissioner & Chairman, District Disaster Management Authority, Khawzawl District kaihhruaiin DC Conference Hall-ah District chhunga Branch YMA te chhiatrupna thlen thulha chetlak dan tur Disaster Management chungchang inzirtirna video insiamsiak, result puan leh lawmman semna hun hman a ni.

Khawzawl District Bawrhsap Pu C.C. Lalchhuangkima chuan intihsiaknaa tel zawng zawngte chungah lawmthu sawiin, khuarel leh mihring thiltih vanga chhiatna chu engtiklai pawha thleng thut thei a nih avangin a lo hmachhawn dan mai bakah inrinlawk dan leh inven dan inzirtir tam a pawimawh a ni, a ti a. YMA chu chhiatna thlen changa chechhuak hmasa an nih thin avangin Disaster Management chungchanga inelna pawh YMA Branch hrang hrangte tan siam a nih thu a tarlang a, intihsiaknaa lawmman dawngtute hnenah certificate leh pawisa fai a hlan zui bawk a ni.

Pu H. Lalramenga, SDC, DM&R Nodal Officer chuan report pein, Mizoram Sawrkar, Disaster Management & Rehabilitation Department atanga Disaster Management kaihhnawiha hriatna leh theihna tipung tura a hranpaa sum dawn hmangin inelna buatsaih a ni tih a sawi a. Video rawn lutte chu Khawzawl DDMA in uluk taka endikin, chhiatrupna (Disaster) thleng thei laka lo inrinlawk dan leh lo hmachhawn dan inzirtirna thuchah (message) a nei tha em tih chu ngaihpawimawh a nih thu a tarlang bawk.

Disaster Management chungchang inzirtirna video insiamsiak hi minute 1 (khat) a rei a ni a. Riangtlei Branch YMA in lirnghing chungchang inzirtirna video an siam chu pakhatna niin, pawisa fai Rs. 7,500/- leh certificate an dawng a. Khawzawl Kawnzar Veng Branch YMA in tuilian vanga buaina thleng thei lo hmachhawn dan video an siam chu pahnihna niin, certificate leh pawisa fai Rs. 5,000/- an dawng a. Khawzawl Arro Veng Branch YMA leh Khawzawl Electric Veng Branch YMA ten lirnghing chungchang inzirtirna an siamte chu pathumna niin, certificate leh pawisa fai Rs. 2,500/- ve ve hlan an ni.

Lawmman pakhatna atanga pathumna bakah hian Branch YMA titha dang panga heng- Biate, Khawhai, Khualen, Khawzawl Hermon Veng leh Khawzawl Dinthar Vengte hnenah certificate leh pawisa fai Rs. 1,000/- theuh hlan an ni bawk.

Nimina result puan leh lawmman semna hunah hian DDMA, Khawzawl District member-te, Sub-Headquarters YMA Khawzawl President leh lawmman dawngtu Branch YMA aiawh pakhat theuh an tel a, intihsiaknaa lawmman dawngtute video thehluh hi thlirho nghal a ni bawk a ni.