1944/2023-2024

Champhai the 19th September 2023 – Kan hma lawka MLA Inthlanpui lo awm tur atana election kaihhnawih sum hman chungchanga Champhai District a thuneitu ber District Expenditure Monitoring Committee chu vawiin chawhnu khan an Chairman Champhai DC & DEO Pu James Lalrinchhana kaihhruaiin DC Conference Hall-ah an thukhawm.

He Committee ah hian DC&DEO chu Chairman niin, PD DRDO Pu Lalrinawma chu Secretary a ni a. Addl DC, Treasury Officer, Addl SP, Election Officer, DIPRO, Deputy Commissioner of State Tax leh Asst Commissioner of Excise & Narcotics-te chu member niin member-te hi an tel kim a ni.

Chairman Champhai DC & DEO Pu James Lalrinchhana chuan District Expenditure Monitoring Committee chu Champhai District-a election kaihhnawih sum hman chungchanga thuneitu leh mawhphurhna fawng vuantu an nih angin election dik leh felfai tak kalpui ngei anih theihnan Committee chu a pawimawh takzet a ni tih hriaa theihtawp chhuah theuh turin member-te a chah a. Election kaihhnawih inkaihhruaina leh kalphung te ECI in a siam thar reng thu sawiin Official-te chu rilru inhawng taka inzir thar reng turin a ngenin a chah bawk a ni.

Vawiin meeting-ah hian Assembly Constituency tin tana District Expenditure Monitoring Committee hnuaia team hrang hrang – Flying Squad, Static Surveillance Team, Video Surveillance Team, Video Viewing Team member tur te thlirhova pawm an nih bakah form hrang hrang te zirho a ni.

General Election to the Legislative Assembly of Mizoram, 2023-ah hian Canidate tin ten cheng nuai 28 thleng an hmang thei a. Heng team hrang hrang kaltlang hian Candidate-te sum hman dan a dik ngei em tih te leh Dan bawhchhiatna a awm em tih te uluk taka enfiah a ni dawn a ni.