Nimin khan Mizoram Chief Election Officer Pu Ashwini Kumar chuan DC zawng zawngte nen election chungchangah video conference a nei a, Lunglei DC Pu V. Sapchhunga hovin Lunglei District sorkar officials pawimawh te chu he DC video-conference-ah hian an tel a ni. Mizoram Election chungchanga Election Commission of India atanga lo kal Dy. Secretary Pi Padma Angmo pawhin he video conference-ah hian election kaihhnawih thil pawimawh a sawifiah a ni.

Election Commission of India-in kum 2010 atanga election kaihhruaina a siamthar pakhat ‘Election Expenditure Monitoring’ chungchang chu vawiin video conference-ah hian sawiho a ni a. Kumin Mizoram inthlannaa candidate zawng zawngte chu campaign chhunga nitina an sum hman dan ‘Expenditure Accounts’ felfai taka ziahluh zel a ngaih tawh dawn a ni.

Mizoram CEO Pu Ashwini Kumar chuan DC tinte chu an District huamchhungah a rang thei ang bera Media Certification & Monitoring Committee (MCMC) din turin a hrilh a. Lunglei District atana MCMC hi Lunglei DC leh DEO ni bawk Pu V.Sapchhunga kaihhruaina hnuaiah din fel tawh a ni nghe nghe a ni.

Thla leh August khian Election Commission member te Mizorama lo zin an tum thu sawiin CEO chuan hemi hma ngeiin District tinah Sector Officer-te ruat tur leh election buaipui tur officials leh security lam pawh ti fel turin DC zawng zawngte a hrilh a ni. Tun thla chhungin political parties zawng zawngte chu First level Training neihpui tum a nih thu leh Mizoram inthlannaa hman tur EVM chhia 187 te chu siamthat a ni mek tih a sawi bawk a ni.