Ram khua leh tui dik tak vote nei ngei ten inthlan nikhua a vote thlak an ngaih pawimawh lehzualna tur atana hmalakna chi khat ‘Systematic Voters’Education And Electoral Participation’ chungchang media workshop chu vawiin khan I&PR auditorium-ah buatsaih a ni a. Mizoram Chief Electoral Officer Pu Ashwani Kumar chuan hawngin, Election Commission of India atanga lo kal Deputy Secretary Pi Padma Angmo chuan workshop sawihona hun a kaihruai zui a ni.

Jt. CEO Pu H. Lalengmawia kaihhruai workshop chawhma hunah hian CEO Pu Ashwani Kumar chuan ram mipui cheng zawng zawng zat atanga chhut a inthlan nikhua a an vote hlu tak thlak thin te hi beisei aiin an la tlem thin avangin hetianga vote hlutna leh inthlan nikhua a vote thlak ngei pawimawh zia inzirtir hi Election Commission of India chuan ram pum huap a neih tulin a hria a ni a ti a. Mizoram bik tarlangin vote neituten vote tha taka an thlak dan te, state dangte khaikhin chuan Mizoram chu vote tlak thatna tak anih thin dan te a sawi a. Amaherawhchu tan lak na tur a la awm thu leh rampum huap a a ber dinhmun hauh theih mai a a beiseiawm dan te a sawi a. CEO chuan vote neitute reng rengin ralmuang leh zalen tak a vote an thlak theih nan venhimna a pawimawh dan te, vote thlakna hmun polling booth cheibawl leh an hmunhma buatsaih a tul dan te a sawi a. Heng duhthusam thlen tur hian mipui mimir, tlawmngai pawl, political party leh a bikin thuthar thehdarhtute tawiawmna chu election buaipuitute mamawh ber a ni a ti. 

Election Commission of India aiawh a mi pawimawh lo kal Pi Padma Angmo chuan Mizoram chu ziak leh chhiar thiam tamna state anih angin vote nei tur a inziahluh te, vote thlak pawimawhzia te chu hre tura ngaih an ni a. Amaherawhchu Mizoram MLA leh MP thlan vote tlak dan khaikhinin tan lakna tur erawh hmabak tam tak a la awm a ni a ti a, vote nei thei chin reng reng ten E-Roll a inziak luh ngei chu khua leh tui dik tak te tihtur a nihzia in hrilh nawn leh a tul a ni a ti a.

Media workshop ah hian inthlan leh vote hlut zia chungchanga hriattur, sukthlek, chetphung, rindan leh tihdan tur(Knowledge, Attitude, Behaviour, Belief, And Practices) zirchianna state pum huapa an neih dan report Dr. Lalbiakmawia Ngente chuan a sawifiah a. CYMA, MHIP, MZP aiawh hruaitu hrang hrang bakah SVEEP atana campus ambassadors ruatten ten anmahni huangchhung theuh a hma an lakdan leh hriattur tul hrang hrang an tih te an sawi zau bawk a ni.

Chawhnu lamah ECI Deputy. Secretary hian sawihona hun kaihruaiin, zawhna leh chhanna te nen inpawh tak a hun hman a ni.