Lunglei District huamchhungah inthlanna thianghlim, felfai leh muanawm neih theih nan a hnuaia tarlan angin hian kawng hrang hrangin ruahmanna siam a ni a, mipuiten heng hi hmelhriata, sorkar hmalaknate an thlawp ve theih nan Lunglei DC leh District Election Officer ni bawk Pu V.Sapchhunga chuan mi zawng zawng hnenah hriattirna leh ngenna a siam a ni.Inthlanna senso endik tur hian Election Commission of India chuan District tin atan Expenditure Observer a ruat dawn a, hemi bakah hian Lunglei District-ah pawh Expenditure Monitoring Cell siam a ni a. Political Party leh Candidate-te sum hman dan uluk taka lo vil tur Monitoring Cell hnuaiah hian a hnuaia mi ang hian peng hrang hrang din a ni bawk a ni :
1). Complaint Monitoring & Call Centre : Inthlanna boruak tichhe zawnga chetna te, sum leh pai leh thildang hmanga inthamna (bribery) te, invauna leh ralthuam/hriamhrei cheleknate reng reng awm lo tura hmalak a ni a. Sum leh pai leh thildang hmanga vote lei leh inthamna chi reng reng chu, a petu leh a dawngtu angkhat rengin IPC Section 171B hnuaiah kum khat lungin tan leh pawisa chawitira hrem theih a ni a. Candidate emaw voter emaw vauna ang chi reng reng pawh IPC Section 171C hmangin kum khat lungin tan leh pawisa chawitir bawka hrem theih a ni. hetianga sum leh pai chelekna leh invauna/inrikrapna leh thil duhawmlo thleng apiangte chu District Election officer hnenah complaint a rang thei anga thehlut turin mipuite ngen an ni a. He Complaint Monitoring & Call Centre-ah hian englai pawhin heng Telphone Nos. ah te hian telephone hmang pawhin complaint thehluh theih a ni : 0372-2322025 (toll free from landline) leh 0372-2324121
(2). Assistant Expenditure Observer : Inthlanna sum hleihluak taka chelek ven nan Assembly Constituence tin atan Assistant Expenditure Observer ruat theuh a ni a, anni hi Expenditure Observer leh RO/DEO te inkara sum senso chungchanga inpawhtawnna (link) pawimawh tak tur an ni.
(3). Flying Squad : Lunglei District pum atan Flying Squad 21 din a ni a, tean tin hi Axecutive Magistrate-in a ho ang a, Police 3 leh Cameraman ten an tawiawm zel ang. Assembly Cosntituency tin hi Flying Squad 3 zelin an vil ang a, hleihluaka sum chelek leh inthamna te, invauna leh hriamhrei cheleknate a lo awm a nih chuan hmun leh hmunah an man nghal thei ang.
(4). Static Surveillance Tean : Constituency tinah Team 3 zel din fel vek a ni tawh a, team tin hi Gazetted Officer-in hovin Police 3 leh Videographer-in an tawiawm zel ang. Anmahni Constituency chanpual theuhah kal kualin a tulna lai apiangah Check Post te siamin zu leh ruihtheih thil dang, hriamhrei leh sum tamtham paiawpn an awm leh awm lohte an check-in an dap thin ang.
(5). Video Surveillance Team : Video-a thla la tur team 8 din a ni a, heng team te hian Assembly Constituency zawng zawng an vil reng a, public meeting leh politics thila punkhawmna ang chi reng reng chu thla an la zel ang. Heng thlalakte hi vawn that vek a ni ang a, thil felhhlel deuh complaint a lo awm pawha documentary proof atana hman a ni ang.
(6). Video Viewing Team : Anni hi District Headquarters-ah awmin Surveillance Team te thlalak an lo endikin, thil fello leh rinhlelhawm te a awm leh awm loh an endik ang a, chutiang thil thlalak atanga hmuhchhuah an neih chuan report nghalin action lak nghal a ni ang.
(7). Accounting Team : Accounting Team te hi Assistant Expenditure Observer kaihhruaina hnuaiah an thawk ang a, Shadow Observation Register (SOR) leh Folder of Evidence (FoE) te Candidate tin tan an vawng ang. Anni hian sum senso chungchanga Team hrang hrangte report ngun takin an lo endik ang a, Candidate-te sensova belh turin ruahmanna an siam ang.
(8). Media Certification & Monitoring Committee : he Committee hi Deputy Commissioner & DEO-in a ho ang a, chanchinbu leh Cable TV-a thuchhuah zawng zawng bakah Party leh Candidate mimal infak mawina ang chi reng reng an endik vek ang. Candidate-te sum senso hi mumal taka endik a ni dawn avangin he Committee hian Expenditure Observer, Asst. Expenditure Observer leh DEO ten vote thlak hmain vawi 3 tal an endik ang.
Model Code of Conduct chungchanga complaint thehlut turte chuan, Telephone emaw ziakin emaw DC/DEO leh Team hrang hrangte bakah complaint chingfela bawhzui tura ruat heng Model Code Officer te hnenah pawh hian a thehluh theih ang :
1. Pu Joseph H.Lalramsanga, PD, DRDA - 9436153445 (Mob)
2. Pu C. Lalmuanpuia, Treasury Officer - 8414094939 (Mob)
3. Pu TC Lalnghakliana, DIO, NIC Lunglei - 9436147811 (Mob)
4. Pi Mina Zoliani Joute, DIPRO Lunglei - 9436156977 (Mob)
