Lunglei District huamchhungah inthlanna thianghlim, felfai leh muanawm neih theih nan Lunglei D.C. Pu V.Sapchhunga hovin tun kar October ni 21 - 23, 2013 chhungin Flying Squads, Asst. Expenditure Observers, Sector Magistartes, Video Surveillance Team, Video Viewing Team, Accounting Team, Static Surveillance Team leh Videographers zawng zawngte tan DC’s Conference Hall-ah training neih a ni a. Lunglei District-ah hian Returning Officer 4, Asst. Returning Officer 6, Nodal Officer 10, Sector Officer 22, Flying Squad 22, Static Surveillance Team 22 leh Model Code Officer 4 ruat an ni.

Vawiina Video Surveillance Team, Video Viewing Team, Accounting Team, Static Surveillance Team leh Videographers te tana Training kaihruaitu Lunglei DC Pu V.Sapchhunga chuan election duty-a kal reng rengte chu rinawm tak leh hawihawm taka hna an thawh a pawimawh thu sawiin Election Commission-in a duhdan ang thlapa mahni chanpual theuh hlen chhuak turin a chah a ni. Inthlanna senso endik turin Election Commission of India chuan Expenditure Observer Distirct tinah a ruat dawn a, hemi bakah hian Lunglei District-ah pawh Expenditure Monitoring Cell siam a nih thu Pu Sapchhunga chuan a sawi a. He Monitoring Cell hian Candidate leh Political Party te sum hman dan uluk taka enpui theihin an vil dawn a, chuvangin Video Surveillance Team, Video Viewing Team, Accounting Team, Static Surveillance Team leh Videographers ten an hnaah fimkhur leh uluk taka an thawh a ngai dawn a ni, a ti bawk. Videographers-te tan a workshop buatsaih leh vat tum a nih thu DC chuan a sawi bawk a ni.

Vawiin training-ah hian Lunglei S.P. Dr.V.J.Chandran pawh telin Lunglei huamchhunga MLA Bial tinah police duty dan tur leh inbiakpawh zung zung theihna tur wireless te pawh ruahman vek a nih tawh thu a sawi.