601/2023-2024

Aizawl 26th May 2023 : Vawiin khan Election Commission of India atanga lo kal Pu Dharmendra Sharma, Senior Election Commissioner leh a team-te chuan Mizoram inthlanpui lo awm tura sawrkar laipui hnuai a Agencies-te inbuatsaihna hrang hrangte enpuina Secretariat Conference Hall, MINECO-ah an nei.

Pu Dharmendra Sharma chuan Election Commission of India-in a duh ber chu inthlanna felfai leh thianghlim tak neih a nih thu a sawi a. Vote nei zawng zawngte vote thlak tura fuih bakah ralmuang taka mipuiten vote an thlak theih nana Dan kenkawh kawnga hmalakte chu pawimawh hmasa a ni, a ti a. Sawrkar laipui aiawh a election duty tur zawng zawngte chu englai poh a in ring reng turin a ti, a. A bik takin Central Government Agencies- tam zawk chu Mizorama hmunhma nghet nei an nih loh avangin inthlanna felfai tak a awm theih nan a ruahmanna tha tak siam turin a ti bawk. Election neihna tur a mamawh an neih ang angte pawh a hma lama ECI- hnen a thlen turin a chah nghal a ni. Central Government Agencies- te chu anmahni zawn theuh ah theihtawp chhuah tur a tiin, Election Conduct Rules - te chu en fo tur a chahin SOP- te khawng taka kalpui turin a chah nghal bawk a ni. Inthlanpui neihna ah ruih hlo leh pawisa a hluar nasa thin chu veiawm a tih thu sawiin Pu Dharmendra Sharma chuan helam a tan la thar turin a ti, a ni. Central Government Agencies- te chu lungrual taka thawktlang tura chahin harsatna an neih te pawh ECI a thlen hreh lo turin a ti bawk a ni.

Sawrkarlaipui hnuaia Agencies- te hian Mizoramah inthlanpui felfai taka awm theih nan a an hmalak tawhna hrang hrangte bakah harsatna an tawh mek te pawh ECI official- te hi an lo hrilh a. Kum 2018 inthlanpui ah dan kalh thil chi hrang hrang- zu, damdawi leh pawisa lem te pawh man a lo ni tawh tih an sawi a, Social media lama dawt thehdarhna kawngah pawh theihtawp an lo chhuah tawh thu an sawi bawk. Inthlanpui lo neih tawh atangin thil tam tak an lo in zirthiam tawh tih sawiin kum tawp a inthlanpui lo awm tur pawh tha, felfai leh ralmuang taka neih a nih an beisei thu an sawi a ni. ECI- duh dan leh tha tih ang taka inthlan hmachhawn thei turin central agencies te hian hma an lak zel tur thu ECI official- te hi an lo hrilh a ni.

Pu Madhup Vyas, Chief Electoral Officer, Mizoram chuan ECI Official-te leh vawiin meeting a lo kal te inmelhriattirna hun a nei a, meeting a lo kalte hnen a lawmthu sawina neiin hun khar nghal a ni.

Election Commission of India atang hian Pu Dharmendra Sharma bakah Pu Nitesh Vyas (Sr.DEC), Pu Hirdesh Kumar (DEC), Pu R.K. Gupta (DEC) bakah Senior Principal Secretaries, Under Secretary leh Director te an lo kal a ni.