600/2023-2024

Aizawl, the 26th May 2023 : Vawiin khan Mizoram Legislative Assembly Speaker Pu Lalrinliana Sailo chuan a bial chhung Khawruhlian Higher Secondary School ten kumin HSSLC Exama an zirlai za a za passed te puala lawmpuina programme an buatsaih chu khuallian niin a hmanpui.

Assembly Speaker leh bialtu MLA Pu Lalrinliana Sailo chuan Khawruhlian Higher Secondary School-in kumina HSSLC Exam a an zirlai naupang zawng zawngin an passed a, hlawhtlinna an chan chu ropui a tih thu sawiin zirlai naupang tumruhna, zirtirtu inpekna leh Khawruhlian khawtlang hruaitute bakah Managing Board te inpekna-in a hrin chhuah a ni ti a, khawtlang tanrualna chhunzawm zel turin a fuih a ni. Zirlai te chu mi hlawhtling an nih a pawimawh rualin, mi hlawhtling leh hlu nih tel tum turin a fuih bakah hei hi ram leh hnamin a mamawh a ni, a ti.

Assembly Speaker tunlai kan khawvelah Social Media hman thiam lohna hian Zoram hi a min run mek thu sawiin aia upa zahna te ti bovin, NGO pawl zahawm tak tak te, Kohhran hlutna te hi a ti nep fo em aw tih theih a ni ta fo mai. Heng social media a mi te chhiatna ringawt thin mi ni lovin, social media hi finna leh thiamna zawnna atana hmang zawk fo turin zirlai te bakah zirtirtu leh nu leh pa kalkhawm te a chah bawk a ni.

Mizo te kan chak lohna awm fo thin chu Saptawng kan hlau te, thiam tum a zir te leh hmang thin te kan nuih fo mai hi kan chak lohna hnar a nih thu sawiin, saptawng hlauhna hi paih bo a, huaisenna nen a hmalam pan turin a fuih bawk a. Mi hlawhtling ni tur chuan huaisen a ngai a, mi huaisen te hlawhtlinna khawvel ani tih hre reng chung leh Pathian tih a, dik leh rinawmna nen a hmalam pan turin zirlai te chah bawk a ni.

Felicitation programme hi Pu Chhawnkima, Chairman, Managing Board Khawruhlian Higher Secondary School-in a kaihruai a. Khawruhlian Higher Secondary School hi kum 2010 a din niin tunah hian Lumpsum status a awm a ni a. Kumin 2023 a MBSE in HSSLC Examination result an tihchhuah-ah zirlai zawng zawng passed in, an din tirh kum 2010 atanga kumin 2023 inkarah hian Khawruhlian Higher Secondary School te hian HSSLC examination result 100% passed rate an neih tum sarih-na a ni a, thawktu Teaching Staff mi pasarih awmin zirlai naupang 48 an awm mek a ni.