Election Commission of India chuan thalaite a bikin kum 18 leh 21 inkarte tan Electoral Roll a an chuan vek theih nan 'Special Drive' buatsaihin beihpui a thlak dawn a. He programme kalpui dan tur hi June ni 1, 2017 khan District Election Officer/DC te chuan an District theuhah an puangzar tawh a. He beihpui hi July ni 1, 2017 atanga tan tur a ni a, July ni 31 thleng kalpui a ni ang.

He Beihpui hian a tum ber chu India khua leh tui dik tak kum 18 tling tawhte tumah hmaih lova Electoral Roll a thun hi a ni a. Kum 18 leh 21 inkar te chu he Beihpui-ah hian ngaihpawimawh bik tur an ni. Hei bakah hian Electoral Roll atanga hming paih (deletion), hming detail inziak dik lo siamthat (correction), constituency danga insawn (transfer) leh consitituency chhunga Polling Station danga insawn (transposition) a tih theih bawk ang.

Dilna form hrang hrangte hi veng/khua tina Booth Level Officer (BLO) te hnen atanga lakchhuah leh thehluh theih a ni ang a, mahni DC, SDO (C) leh BDP office ah te a ngaihven theih bawk ang. Online in nvsp.in ah application a tih theih bawk. Hriat chian duh leh hriatbelh duh nei tan (0389) 19 50 (toll free) ah a zawhfiah theih bawk.

He Special Drive July thlaa neih tur hi mi tinin hmang tangkai a, a tul dan ang a kan chhungte emaw, thiante hrilh chhawng zel turin an ngenin an hriattir a ni.