Thingsulthliah Teachers Association (TTA) te bultuma  buatsaih, Thingsulthliah atanga Pawl 10 leh 12 pass tharte lawmpuina hun Thingsulthliah Community Hall-a neih chu vawiin chawhnu khan Home Minister leh bialtu MLA ni bawk Pu R. Lalzirliana’n a hmanpui

Home Minister  chuan zirlai pass tharte chu rilru taka a lawmpui thu  sawiin, tuna an hlawhtlinna hi  bultanna tur chauh ani tih hriain  inthununna, thuawihna leh taimakna nena zir zel turin a fuih a. Zo ze mawi tello thiamna chu thil hlauhawm tak anih thu sawiin, khawihmunah pawh awm ila Mizo kan nihna ah chiang tlatin  Mizo nun zemawi  chawinung  zel ang u, a ti a. Pu R. Lalzirliana chuan incheina tha ber chu silh leh fen ni lovin  thiamna a nih zawk thu leh thiamna chhawr tlak,  kan ram  chauh nilo ram pawn thlengpha  nei ngei tura tan la turin kalkhawmte chu a chah a. Zirlai pass thar te chu nu leh pa tana phurrit leh midangte tanpuina dil reng thin mi nih tum lovin, tum mumal tak leh thiamna tak tak zir chhuak thei tura tan la sauh sauh turin a chah a. Mihring nun hi dam rei lamah ni lovin dam hun chhunga kan thil tihah te chhiar a ni zawk tih hre reng chungin zirlaite chu ram leh hnam tana hna ropui tak thawh tum theuh turin a fuih a. Minister chuan zirlaite chu an kal zelna turah duhsakna a hlan nghal a ni.

Kumin HSLC result puan takah khan Thingsulthliah khua a  High School pathum atanga zirlai exam beitu 73 zinga 64  (84.9 %) te an pass a. HSSLC  exam beitu 38 zinga 35 (92.1%) te an pass a ni. He hunah hian Thingsulthliah khaw mi, khawdanga school kala pass te pawh chawimawi  an ni bawk. Pass tharte hi chawimawina certificate leh thilpek hlan an ni.

Lawmpuina hun hi Pu VL Hmunluahpuia, President, Thingsulthliah Teachers Association in a kaihruai a. Pu Vanlalthlana, Thingsulthliah High School Headmaster-in inlawmna a sawi a. Pu C. Laldawngliana, Secretary, Thingsulthliah Teachers  Association hnen atangin result tlangpui ngaihthlakna neih a ni a. He hunah hian  Pu Lalchhanhima, BDO Thingsulthliah; Thingsulthliah Development Committee (TDC) hotute; khawtlang hruaitu te, zirtirtu leh zirlai te an tel a ni.