Vawiin khan Health& Family Welfare Minister Pu Lal Thanzara chuan Mizoram College of Nursing (MCON) Falkawn Hostel Building sak thar a hawng. He hunah hian Parliamentary Secretary Lt. Col (Rtd.) Z.S Zuala chu khual zahawm niin, Parliamentary Secretary Pu H. Zothangliana leh Chief Information Commissioner Pu Lalduhthlana Ralte IFS(rtd.) an tel bawk a ni.

Health Minister chuan hawnna inkhawmah hian kum 37 hnua mahni puala hostel building tha tak MCON in a nei thei chu lawmawm a tih thu sawiin MCON in hostel changtlung tak mai an neih hi Health Department tan chauh nilovin, Mizoram tana  asset ropui tak a ni, a ti a.Pu Lal Thanzara chuan Mizoram atanga nurse zirchhuak tha tak tak kan neih te chuan  ram pawna an thawhna ah pawh Mizo hming anti tha thin a ni, a ti a. Mizoram atanga nursing zirchhuak te tan ram chhungah leh ram pawnah hnathawh tur a inhawn zelna turin sawrkarin hma a lak mek thu a sawi bawk a. Insak leh neih harsatzia hriaa mahni ta  anga uluk leh thianghlim taka hostel thar chu luahzui turin MCON zirlai leh thawktute chu Health Minister chuan a chah bawk a ni.

Pu Lal Thanzara chuan Mizoram Health sector-in hma nasa taka  a sawn thu a tarlang a. Siaha, Serchhip, Champhai, Mamit, Lunglei ah te Eye Ward leh Operation Theatre sak zawh tawh a nih bakah Integrated Ayush Hospital Thenzawl ah hawn tawh niin, Dental OPD Building Kolasib, Serchhip, Mamit leh Champhai ah te sak zawh tawh a ni, a ti a. Aizawl Civil Hospital ah pawh tunhnaiah Dental Ward hawn thar niin cabin hawn belh anih thu leh Digital Xray machine te pawh an neih thar thu Minister chuan a tarlang a ni.

Khual Zahawm Lt.Col (rtd.) Z.S Zuala pawhin thusawiin Aizawl Civil Hospital chu India rama Civil Hospital ah chuan a faiber pawl anih avangin chhuanawm a tih thu a sawi a. Nurse te chu an damlo enkawlte damna an kutah thui tak a innghat ani tiin hmangaihna leh lainatna nen damlote enkawl thin turin MCON a nurse zirlaite a chah a ni.

Cheng nuai 1119.64 senga sak hostel building hi Block I leh Block II a then hran a ni a. Block I hi 1413.84 sqm a zau niin, Block II hi 1372.65 sqm a zau a ni a. Chhawng 5 veve niin a pumpuiah zirlai room tur 80 awmin khum 160 leng tura ruahman a ni. MCON hi kum 1980 khan din niin tun dinhmunah B.Sc Nursing zirlai 118 an nei a ni.

Hostel Building hawnna inkhawm hi Health & family welfare Department Commissioner & Secretary Pu Lalrinliana Fanai IAS chuan a kaihruai a Health Department hotute an tel kim hle a ni . Dr. F Lallianhlira Principal Director , H&FW Department chuan kalkhawmte lawmna  thu a sawi a, technical report PWD Sr.EE Er. Lalthanzuala Ralte chuan a pe a, MCON Principal Pi Lalchhanhimi chuan lawmthu sawina in hun a khar a ni.

MCON Hostel Building hawnna inkhawm hman zawhah hian Health Minister Pu Lal Thanzara, Parliamentary Secretary Lt.Col (Rtd.) ZS Zuala, Parliamentary Secretary Pu H.Zothangliana, Pu Lalduhthlana Ralte IFS (rtd) Chief Information Commissioner, Secretary Health & Family Welfare Department, Principal Director H&FW Department, Director Hospital and medical Education leh Director of Health Services te chuan State Referral Hospital Falkawn chu tlawhin a hmunah an mamawhte leh hmalakna te an enfiah nghal a ni.

 

Attachment

  • Loading attachment...