Nimin khan Cure Clubfoot Mizoram (CCFM) buatsaihin Millenium Centre kawtah World Clubfoot Day 2017 hman a ni a. He hunah hian Parliamentary Secretary Pu Joseph Lalhimpuia chu khuallian a ni.

World Clubfoot Day puala inkhawmnaah hian Parliamentary Secretary Pu Joseph Lalhimpuia chuan clubfoot (ke-lek) hi mi tam takin an la hriatchian loh avangin leh enkawl dam theih ani tih hrelo te an la awm avangin awareness kalpui zel a pawimawh thu a sawi a. Cure Clubfoot Mizoram te hmalakna chu chhuanawm a tih thu sawiin mahni mihringpuite phut let nei miahloa tanpui hi Pathian rawngbawlna leh  hna zahawm ber a ni, a ti a. CCFM rawngbawlna avanga naupang clubfoot nei pangai taka kal thei ta te han hmuh chu lawmawm a tih thu Pu Joseph Lalhimpuia chuan a sawi bawk a. Mahni hmun theuhah Pathianin min dah chhan tihlawhtling tura  theihtawp chhuaha hma la zel turin kalkhawmte a fuih nghal bawk a ni.

CCFM Chairman Pi Zohmingthangi Sailo chuan thu sawi bawkin, Lunglei leh Aizawl Civil Hospital-ah kartin ningani apiangin Ortho OPD-ah Clubfoot Clinic hawngin Ponseti Method hmanga Ke-lek te enkawl thin a nih thu a sawi a.  Mithiamte chhut danin nausen 1000 zelah ke-lek 1 an pian thu a sawi a, Mizoram bikah hian CCFM chuan nausen leh naupang ke-lek 57 an enkawl tawh thu a sawi bawk a. Pi Zohmingthangi Sailo chuan Mizoram Sawrkar Health Department National Health Mission hnuaia Rashtriya Bal Swasthya Karyakram (RBSK) nen thawkhovin CCFM chuan a thlawnin naupang ke-lek te chu enkawlin pheikhawk bun chi bik te pawh a thlawna an pek thin thu a sawi a. CCFM Chairman chuan World Clubfoot Day thupui chu  “Khawvel atanga ke-lek piansualna umbo” anih angin nausen/naupang ke-lek nei zawng zawngin enkawlna an dawna an dam theihnan theihtawpa hma an lak thu a sawi a, mipuite chu ke-lek nei an hriat chuan lo benvar pui turin a sawm nghal a ni.

He hunah  hian CCFM Financial Secretary Dr. Lalnghakliana chuan clubfoot (ke-lek) chungchang leh a enkawl dante sawifiahin Clubfoot neite chu an kephah chhung lamah a inherh thu leh, hemi enkawl dam tur hian zawi tete a ke sawngbawl hnu ah plaster-a tuam khawnga, pheikhawk hranpa te bun tir leh tuam chhoh zel chuan a dam theih thu a sawi a ni.

World Clubfoot Day puala inkhawm hi Rev. Lalzarliana’n a kaihruai a, he hunah hian naupang ke-lek enkawl dam tawh nu leh pate hnen atangin testimony ngaihthlak a ni bawk a ni.