Vawiin khan Aizawl District Election Officer, Pu Kannan Gopinathan chuan  “Special Drive” kumin July thla chhunga neih tur chungchangah DC Conference Hall-ah press conference a ko a. Special Drive chungchanga Election Commission of India (ECI) ruahmanna inhrilhhriat a ni.

Special Drive July thla chhunga neih turah hian kum 18-21 inkar Electoral Roll-a la chuang lo te tan inthun theih niin mitthi tawh Electoral Roll-a  hming la chuang si te Roll atanga hming paih tur a ni bawk. Hei bakah hian hming/details inziak diklo siamthat (correction), constituency danga insawn (transfer) leh constituency chhunga Polling Station danga insawn (transposition) a tih theih bawk ang.

Electoral Roll a inthunna tur Form 6 leh mitthi hming paihna tur Form 7 te hi July thla chhungin bialtu BLO(Booth Level Officer) hnen atang leh  Aizawl DC Office-a Voter Facilitation Centre, SDO (C) office leh BDO office atangin lak theih a ni ang. Form 6 leh 7 hi Election Commission of India website eci.nic.in (Forms for registration in E-Roll) atangin download theih a ni bawk a. Heng form te hi fillup hnuah July thla chhungin BLO, AERO (Assistant Electoral Registration Officer), ERO (Electoral Registration Officer), leh DEO (District Election Officer) hnenah thehluh theih a ni.

Special Drive hun chhung hian BLO chuan a bial chhunga vote nei theite zawng chhuak turin Form kengin a tlawh kual dawn a. Hei bakah hian Polling Station tinah Special Camp July ni 8 atang July ni 22 thleng huaihawt ani anga, Polling Station tinah hian BLO te Form lo dawng turin leh dilna thelut duhte lo pui turin an thu dawn a ni. BLO hnen atang hian Electoral Roll a hming awm leh awmloh en theih nghal a ni ang.

DEO Aizawl chuan Roll-a lut thei, kumtling thar zawng zawngte chu Roll-a inziak lut vek turin a hriattir a. A hnua  tihdikna(correction) siam ngai a tam thin avangin Form 6 fillup laiin tihsual/ziahsual palh awmlo tura fimkhur taka Birth Certificate nen inmil thlapin, hawrawppuia hming  ziah thin nise, a ti a. Mitthi tawh Roll-a hming la chuangte paih kawngah BLO te lo pui zel turin mitthi chhungte, political party te leh NGO te ngenin kumtling thar Electoral Roll-a thun theih te thun an nih theihna atan theihtawp chhuahpui turin political party leh NGO-te a sawm nghal bawk a ni.

DC Conference Hall-ah hian chawhnu lamah Special Drive in buatsaihna atan EO (Election Officer), ERO(Electoral Registration Officer) leh AERO (Assistant Electoral Registraion Officer) training neih nghal a ni.