Vawiin khan Chief Minister Pu Lal Thanhawla hovin Green Mizoram Day 2017 hman dan tur relin, State Level Committee on Green Mizoram chu CMO, Conference Hall ah an thukhawm. 

Meeting ah thuhma sawiin Chief Minister Pu Lal Thanhawla chuan sum, tha leh hun senga kum tak tak kalta atanga Green Mizoram Day a thing leh a tiak phun te hi an damkhawchhuah theih nan a enkawl zuina lam hi kan ngaihtuah leh ngaihpawimawh a tul a, chu mai bakah thangtharte hnenah thingphun pawimawh zia te hrilhhriatna leh zirtirna lamah tanlak a ngai tih a sawi a. Nungcha hrang hrang biodiversity tih mai Mizoram-in a neih that thu sawiin hengte leh thingphun te hi inzawm vek an ni a, biodiversity humhalh turin thingphun leh ramngaw siam a pawimawh a, tuihna kang chat mek siamthatna kawng te, sik leh sa inthlak danglam global warming tih ziaawm nan te leh leihnuai tui chiah chin water level tih san nan te thingphun hian awmze thui tak an nei tih a sawi bawk a. Meeting ah hian Chief Minister chuan tunhnai Sawrkar Laipuia Forests changtu Union Minister Pu Anil Madhav Dave a boral chu a ui thu sawiin environment tana thawhhlawk leh hemi chungchang veia hmalakna tha thahnem tak siamtu a nih thu te a sawi a ni. 

Principal Secretary to Chief Minister leh Principal Chief Conservator of Forests Pu Lalram Thanga chuan Green Mizoram Day 2017 hman dan tur ruahmanna duan lawk te chu meeting ah pharhin hengte hi Member ten an sawiho hnuin Green Mizoram Day hman dan tur chungchanga thutlukna siam a ni. 

Green Mizoram Day hi June ni 11 ah hman thin a ni a, mahse kumin hian he Ni hi Chawlhni (Sunday) a a tlak avangin June ni 9 ah Green Mizoram Day hi hman an rel a. Green Mizoram Day 2017 inkhawm leh a puala thingphun hi kumin chuan Chite lui kam tawn – Ramthar leh Thuampui panna bulah hman leh phun rel a ni a. Official function hi zing dar 7:00 a hman tura ruahman niin Chief Minister chu he programme hmanpui turin beisei a ni a. Helai hmun thlan a nihna chhan chu Chite lui lo bawlhhlawh lutuk ta leh a tuihna pawh a kangchah tep avangin a thuam tha tura hmalakna pawimawh tak a nih theih beiseiin helai hmun hi Green Mizoram Day puala thingphunna atana rawt a nih thu meeting ah hian tarlan a ni. 

Official function zawh zing dar 9:00 AM ah hian helai hmunah Department-te, NGO hrang hrangte leh mipui nawlpuiin mass planting neih nise tih an rel bawk a. Kumin Green Mizoram Day thupui atan ‘Thing phun la, tuihna siam rawh’ tih chu thlan a ni a. Green Mizoram Day a thing phun tur chu a remchang a piang phun lova, a phunna hmun zir a species thlan nise tih leh heng thing tiak te hi a upa leh a lian deuh thlan nise tih te, State Level Committee atangin media hrang hrang ah thuchhuah puanchhuahna neih nise tih te leh Talk Show pawh neih nise tih te chu meeting ah hian rel a ni a. Green Mizoram Day ah hian kangmei laka venna kawnga District ti thate hnenah lawmman hlan an ni dawn bawk a ni. 

Green Mizoram Day hman tirh 1999 atanga nikum 2016 thlenga Green Mizoram Day a thing tiak phun leh sem tawh chu 36,58,174 a tling tawh a ni.  

Attachment

  • Loading attachment...