Vawiin chawhma khan Rajya Sabha Member of Parliament, Pu Ronald Sapa Tlau chuan Mizoram Sawrkar-a Health and Family Welfare Department; Public Health Foundation of India (PHFI), New Delhi; All India Institute of Medical Sciences (AIIMS), New Delhi leh Centre for Chronic Disease Control (CCDC), New Delhi buatsaih ni hnih awh tur “Training Workshop for Medical Officers on Evidence-based Diagnosis and Management of Hypertension and Type-2 Diabetes” hawnna chu I&PR Conference Hall-ah a hmanpui a. He workshop hi Ministry of Development of North Eastern Region (DoNER)  project-Swasth Uttar Purv : Healthy North East & National Program for Prevention and Control of Cancer, Diabetes, Cardio-Vascular Diseases & Stroke (NPCDCS) bultum niin, thupui chu “Health Technology Enabled Quality Improvement Intervention for NCD Care Delivery in Mizoram” a ni.

Pu Ronald Sapa Tlau chuan khawvel thang zelah Non-Communicable Disease (NCD) chu India rama natna thang nasa pawl anih thu sawiin tihniam turin tan lak  a pawimawh a ni, a ti a . Ram hmasawnna tehna pakhat chu Infant Mortality Rate (IMR) ani tiin district hrang hranga IMR tihniam turin theihtawp chhuah a ngai a ni, a ti a. Mizoram chu cancer leh HIV/AIDS vei tamna kan nih angin hemi kawngah hian tan lak a ngaih thu a tarlang a. Public Health Foundation of India (PHFI) chuan workshop an neihpui chu lawmawm a tih thu sawiin hun lo kal turah pawh thawhhona neih zel a beisei thu Rajya Sabha MP chuan a sawi a. Doctor te chuan khawvel changkanna in a ken tel technology chu hriselna kawnga hmasawnna atan hmang tangkaia he workshop hi hlawkpui ngei turin Pu Ronald Sapa Tlau chuan a chah a. Hriselna-a hmasawnna kawngah pawh State dang nena inkhaikhin pah zela hma la turin kalkhawmte chu a fuih bawk a ni.

National Program for Prevention and Control of Cancer, Diabetes, Cardio-Vascular Diseases & Stroke (NPCDCS) hi National Health Mission (NHM) hnuaia kalpui niin India rama Non-Communicable Disease (natna inkaichhawn loh chi) buaipui tura din a ni a. He program in huamte chu – Cancer, Diabetes (Zunthlum), Lung leh thisen zam natna (BP sang, lung natna, heart attack) leh stroke te an ni a. Kum 2010 khan NPCDCS hi din tan niin 2017-ah chuan district 616-a dah tura ruahman a ni a. Kum 2014 khan Mizoram-ah chuan din tan niin tun dinhmunah district 8-ah NPCDCS hi din a ni tawh a ni.

Public Health Foundation of India (PHFI) hi Public leh Private thawhhona hnuaia kalpui niin India ram mipui te an hrisel zawk na atana thawktute an ni a.  Mizoram-a programme an kalpui tur te chu- Cancer Workshop leh Cancer awareness campaign neih, Primary care physician 20-te natna benvawn chungchanga train, sawrkar hnathawk 5-te public health management-a training neihpui leh technology hmanga NCD Care Delivery tih changtlun te an ni.

He hunah hian Mizoram-a National Health Mission (NHM) Director Dr. Lalrozama (IAS) chuan kalkhawmte lawmna thu  a sawi a. H&FW Deputy Director leh State Nodal Officer (NCD) ni bawk, Dr. Eric Zomawia chuan thu a sawi  bawk a. Dr. Priscilla C Ngaihte, In Charge, Special projects, North East Region, PHFI and Co-Lead, Swasth Uttar Purv; Dr. Mihir Saikia, Dept of Endocrinology, Assam Medical College leh Dr. Sandeep Bhalla hnen atangin thusawi ngaihthlak a ni a. Workshop hmanpui tur hian Mizoram pawn atangin mithiam tak tak an rawn kal a ni.