Vawiin hian Serchhip Bawrhsap Pi Sangchhin Chinzah chuan Serchhip Hmar Venga Mini Sport Complex, UD&PA Department hnuaia NBCC in an thawh mek chu a tlawh a. An hmalakna hrang hrangte enpuiin an hnathawh dan leh an hmathar lakna te a hnena hrilh hre zel turin Contractor te a hrilh. 

He Mini Sport Complex, Rs. 12 Crore senna tur sak mek hi Sub Headquarters YMA leh Sub Headquarters YMA hnuaia Vigilance & Monitoring Committee ten Bawrhsap an ngenna angin Bawrhsap hian Civil Engineer hruaiin a tlawh a, a sak phunga YMA lamin ngaimawh an neih ang ang te uluk takin an enfiah a ni. Pi Sangchhin Chinzah chuan, approved Design and Drawing atanga hnatawh tur awm ang chi zawng zawngte a nihna tur ang thlapa thawk tur leh, hmalakna thar an neih apianga a hnena hrilh hre zel turin Contractor te a hrilh a. Sport Complex tha leh rotling a nih ngei theih nan theihtawp chhuah tura ngenin a tul ang zela pui tura a inhuam thu a hrilh a ni. 

YMA lam ten phullem phahna tur (field chhuat) hnuaia tui luan bona tur pipe phum an tum lo nia an rin chungchangah Contractor te hian metre 5 dan zelah pipe hi an phum vek tur thu leh a pipe pawh an chah mek thu Bawrhsap hi an hrilh a, pipe atanga field sira tui luankawra a inchhun luhna tur pawh a hrana an la verh leh vek tur thu an sawifiah a ni. Tin, Pavilion-a plastic Chair an fit pawh a inkar a zim lutuk avanga tihthawl an duh thu an thlen te pawh siamrem leh vek a nih tur thu Bawrhsap hi an hrilh bawk. Hetihlai hian Contractor ten an bungrua leh hmaraw thenkhatten misual kut a tuar zeuh zeuh thin nia an sawi chungchangah Pi Sangchhin Chinzah hian SP a lo sawipui tur thu hrilhin, chutiang an tawh apiangin rang taka Police hrilh hre thin turin a ngen a ni. 

Serchhip Mini Sport Complex hi kum 2011 atanga bul tan niin tunah hian hna tam zawk chu thawh zawh tawh a ni a, hnathawktute hi NBCC hnuaia Agni Shanti Buildtech Ltd, niin tunah hian phullem phahna tur field chhuat an thawk mek a ni. Tluang taka hnathawh zel a nih chuan reilotea zawh theih mai beisei a ni tawh a ni. Football Field bik hi a dung Metres 110 leh avang Metres 74 tura duan niin a sirah hian Athletics track siamna tur hmunawl zuah a ni a. A sir kual chhuakin mipui thutna tur siam vek a ni bawk. 

Pi Sangchhin Chinzah in he hnathawh mek a tlawh hi Pu K. Saitluanga, IPRO leh Pu Bianthansanga, A.E, DRDA bakah Sub Headquarters YMA President Pu R. Sanghmingthanga, Secretary Pu Lalrammawia leh YMA hnuaia Vigilance & Monitoring Committee Chairman Pu Kapliana Pachuau leh YMA hruaitu dangten an tawiawm a ni.