Pachhunga University College (PUC) 'Nauban Huan'  chu College Seminar Hall-ah vawiin khan Mizoram Chief Secretary, Pu Lalmalsawma, IAS chuan a hawng.

Khuallian Pu Lalmalsawma, Chief Secretary chuan, tunlai khawvelah class room zirna chauh ni lovin, an zirlai a taka hman a pawimawh tawh thu a sawi a. India ram chu a mipui atanga chhuta hnathawk thei thalai ngah ber zinga mi a nih thu a sawi a. Hei vang hian entrepreneurship lamah tan kan lak a tul niin a sawi bawk.

College Principal, Dr. Tawnenga pawhin thu sawiin, nauban chu pangpar mawi tak a nih thu leh nun tihlim theitu a nih thu sawiin, zirlaite leh mipui tan pawha tlawh manhla tak a la nih theih a beisei thu a sawi a. A enkawl zuitu tur, Nauban Huan Committee pawh din nghal a nih thu a sawi bawk.

PU college hian ram acre 700 vela zau an nei a, hetah hian ramngaw tha tak awmin nungcha chi hrang hrang an awm. Nauban huan bikah hian nauban chi hrang tam tak khawi thar a ni a, department wise in nauban hi an khawi a ni.

World Environment Day, June ni 5 denchhena PU College campus chhunga siam thar 'Nauban Huan' atan hian, 'One Teacher, One Orchid' thupuia neiin zirtirtu zawng zawng ten nauban an thawh vek a. Heng hi nauban huanah hian an dah a ni.

Nauban huan hawnna inkhawmah hian zirtirtu leh zirlai thahnem tak an tel a, Vice Principal, Pi Lalhlimpuii’n a kaihruai a ni.