2629/2023-2024

2023 Sahmulphah thla ni 3: Mizoram Legislative Assembly Inthlanpui, 2023 buatsaih tura Kolasib District chhunga election duty (official/polling party/security duty)-te leh essential service-te tan vawiin khan Kolasib District chhunga hmun hrang hrangah postal ballot-a vote thlakna hmun, facilitation centre hawn a ni.

Election official duty Kolasib District chhunga vote neite tan Kolasib DC Conference Hall-ah facilitation centre hi ruahman niin, Kolasib District pawn lama vote neite tan Kolasib DC Office Establishment Room-ah ruahman a ni thung a. Polling party Kolasib District chhung leh District pawna vote neite tan Government Kolasib College-ah facilitation centre siam niin, security duty-te tan Kolasib SP Conference Hall-ah siam a ni bawk a. Essential service, Form 12D hmanga postal ballot vote thlak dilte tan assembly constituency chhung hmun laili lai - Tuirial bial chhunga awm tan SDO (Civil) Office, Kawnpui; Kolasib tan CMO Office, Kolasib; Serlui tan SDO (Civil) Office, Vairengte-ah te facilitation centre hi buatsaih a ni bawk.

Kolasib District pawna vote neite tana facilitation centre buatsaihah vawiin khan Kolasib District Election Officer Pu John LT Sanga chuan postal ballot hmangin vote a thlak a. A rual hian 4-Tuirial (ST) AC Returning Officer Pi Melody Ngurthantluangi, 6-Serlui (ST) AC Returning Officer Pu Lalmuan Puia leh Kolasib DIPRO & MCMC Member Secretary Pu C. Lalhruaitluanga te pawhin postal ballot vote hi an thlak ve nghal a ni.