2628/2023-2024

Lawngtlai dated 3rd November 2023: Lawngtlai District-ah MLA inthlanpui nei turin inbuatsaihna ngawrh tak a kalpui mek a ni a. Kum lam a upate leh pianphung a rualban lo, Polling Station pan kawng a harsatna nei ten mahni in lamah vote an thlak theih nan Mobile Polling team-ten Home Voting an kalpuina ah mi 96-in vote an thlak tawh bawk a ni.

Lawngtlai district chhung a vote nei, Election kaihnawih a duty chhuak tur ten Postal Ballot hmangin vote an thlak bak ah vawiin atang khan Facilitation Centre, Deputy Commissioner Office-ah Lawngtlai district pawn a vote nei, Election Official-ten Postal Ballot hmangin Vote an thlak tan bawk a ni. 

District Election Officer chuan hriattirna hrang hrang a tih chhuah zing ah CrPC sec 144 hmang a November ni 5, chawhnu dar 4:00 atanga November ni 7, chawhnu dar 4:00 thleng mi 5 aia tam punkhawm khapna te, hemi hun chhung a Opinion Poll leh Exit Poll lak chungchangte, Campaigner mahni vote neihna ni lo Assembly Constituency chhuahsan tur a hriattirna leh aurinna hman khapna thupekte a tel bawk a ni. MLA Election-a EVM leh VVPAT hman tur endikna leh bithliahna kalpui tawh niin hman theih tur a ruahmanna (Commissioning) pawh he thu buatsaih lai hian kalpui mek a ni a. Polling Station hrang hrang a Polling Official kalchhuah dan tur tihchianna (Final Randomization of Polling Parties) hi naktuk chawhma dar 7-ah neih tur niin Chandmary, Bazar leh Electric Veng YLA Hall-ah Training an nei nghal dawn a ni. 

Election Commission of India in inkaihhruaina a tih chhuah angin inthlan ni leh inthlanna kalpui hma ni (6 & 7 November) hian Media Certification & Monitoring Committee-te phalna la hmasa lovin chanchinbu kaltlang a Political Advertisement chhuah a khap a, Opinion Poll leh Exit Poll lak chungchangah inkhuahkhirhna dan a siam bawk a ni. Lawngtlai district-ah hian Voter 91439 awmin 36-Tuichawng Assembly Constituency-ah voter 36042 an awm a, 37-Lawngtlai West ah voter 29493 awmin 38-Lawngtlai East ah voter 25904 an awm bawk a ni. Voter awm zat atanga 45685 chu mipa an ni a, 45754 chu hmeichhia an ni a. Lawngtlai district-ah hian Service Voter 232 awm anga chhinchhiah a ni bawk. 36-Tuichawng AC ah Polling Station 70 awmin 37-Lawngtlai West AC ah Polling Station 69 awm a. 38-Lawngtlai East AC ah Polling Station 42 a awm bawk a ni.