2199/2023-2024

Champhai the 6th October, 2023 – Mizoram Assembly Election, 2023 hmachhawn tura inpuahchahna kal zelah vawiin khan Champhai DC & DEO Pu James Lalrinchhana kaihhruaiin Champhai District huamchhunga inkalpawhna kawng dinhmun chungchangah meeting neih a ni.

Meeting-ah hian Champhai District Election officials-te leh District huamchhunga kawng chungchanga mawhphurhna chelhtute – PWD Mizoram Champhai Division, 74-RCC (GREF) Border Road Task Force (BRTF) leh National Highways & Infrastructure Development Corporation Ltd (NHIDCL), PMU-Seling hotute an tel a ni.

Champhai District huamchhunga Polling Station 84-te panna kawng dinhmun chipchair taka sawihova, zirho a ni a. Heng Polling Station 84-te zingah hian 78-te chu a panna kawng black topping/white topping niin, kawng a tha tih report a ni a. Polling Station paruk – Hruaikawn, Saikhumphai, Chawngtui E, Thekpui, Pamchung, Murlen panna kawng te chu kaccha road/fair weather road ani tih report a ni.

Meeting kaihruaitu Champhai DC & DEO Pu James Lalrinchhana chuan inthlan hlawhtling taka neih anih theihnan Polling official leh mipuite tan inkalpawhna kawng tha tak a awm a tul a ni tiin, District kawng chunghanga mawhphurna neitute PWD, BRTF leh NHIDCL te chu an hma zawn theuhah a tul anga hma la nghal turin a chah a. Kawngpui dung mai piah lamah polling station panna bik kawng te pawh siam tha tel turin a chah a. Kawng siam chu hun reilote a zawhfel thut anih theihloh avangin tun atanga plan mumal tak lo siam lawk a, a theih anga hma la vat turin a chah bawk a ni. Inthlan ni (Poll Day) leh a dawn ni (P-1) phei chu ngai pawimawh zual tura chahin heng ni pawimawh ah te hian inkalpawhna chhiat avanga harsatna awm miahlo tura hma lo la turin a chah a ni.

Champhai DC & DEO Pu James Lalrinchhana chuan inthlan chu Democracy rama hun pawimawh tak anih angin official-te pawh phur tak leh rilru zangkhai taka an duty te hlenchhuak tura chahin harsatna an neihte pawh inthlahrung lova District Administration-a thlen thuai thin turin a chah a ni.