Vawiin khan Aizawl DC Conference Hall ah Mizoram Assembly Election atana mawhphurhna chelhtu nodal officer hrang hrang ten an hmalakna te leh hmalak zel dan tur te sawihovin an thukhawm a, Dr. Lalhriatzuali Ralte, IAS, Dy. DEO, Aizawlin a kaihruai a ni.

Vawiin thutkhawmah hian Election atana ruahmanna peng hrang hranga mawhphur tu ten an hmalakna leh hmalak chhunzawm dan tur tha ni a an hriatte an sawiho a, Model Code of Conduct leh Media kaltlanga zawm tur dan siam te mipuite leh political party te hrilhfiah chian lehzual ngai a hriatna a awm avangin hetiang inhrilhfiahna tur Talk Show leh Discussion te buatsaih a Cable TV, DDK leh All India Radio kaltlanga puanzar tura ruahmanna siam tum a ni. Heng bakah hian Aizawl District a election duty a rawn kal tur BSF Coy 1 leh Assam Police Coy 1 October ni 31 a lo thleng tur te lo dawnsawn dan tur sawiho a ni a, Election Observer lo kal tur te buaipui dan tur pawh sawiho a ni bawk. Heng bakah hian Postal ballot hmanga vote thlak dan tur leh service voters te tana ruahmanna siam te sawiho a ni bawk.