Vawiin khan Vanapa Hall, Aizawl ah NEDP hnuaia Aizawl Traffic Jam Free programme hnuaiah Transport Department chuan 2-wheeler taxi khalhtuten an hriattur pawimawh inhrilhhriatna hun Awareness Campaign an buatsaih a. He hun hi Pu HL Rochungnunga, IAS, Commissioner and Secretary, Government of Mizoram, Transport Department in khuallian angin a hmanpui.

Awareness Campaign for Aizawl 2-Wheeler Taxi hmanna ah hian khuallian Pu HL Rochungnunga, IAS Commissioner and Secretary, Transport Department chuan 2-Wheeler Taxi khalhtute chu sawrkar in a man (rate) a bituk kilometre khata cheng 20 aia tam la lo turin a hriattir a, rate chungchanga complain office lama lut te hi a dik ngei ani tih finfiah anih chuan 2-wheeler taxi neitute hnenah hian dan angin an chungah action lak anih tur thu a sawi a. Sawrkar in a man chungchanga dan a siam pel lo turin a hrilh bawk ani.  Aizawl khawpuia tlan 2-wheeler taxi khalhtute chu an inchei dan uluk leh zual tur leh tur hawihawm taka awm turin a hriattir bawk a ni.

Pu Krishna Mohan Uppu, IAS, Director Transport Department pawhin thu sawiin, 2- Wheeler taxi khalhtute chu sawrkar in a man tura a siam aia tam la lo turin a hrilh a, hei hi an zawm loh chuan khawpui danga an tih thin angin mini-metre te pawh vuah hun ala awm theih thu a sawi. Driver te chu rui chunga an lirthei khalh lo tur leh fimkhur leh zual turin a chah bawk a ni.

Awareness Campaign for Aizawl 2- Wheeler Taxi ah hian Traffic Police OC Pu H.Laltanpuia chu resouce person a ni a, traffic dan zawm chungchang ah leh heng taxi khalhtute tana pawimawh thu tha tak tak a sawi a ni.  Transport Department Joint Director Pu R.Lalrammawia'n a tawp kharna thu a sawi bawk a ni.

India ramah a vawi khatna atan 2-Wheeler Taxi hi Aizawl ah kumin (2018) atang khan hman tan a ni a, sawrkar in a lo rel tawh angin mi 500 hnenah 2-wheeler taxi permit hi pek tawh a ni. Sawrkar chuan 2-wheeler taxi chuan man hi en nawnin kilometre khatah cheng 20 a tuk a, kilometre khat tlan zawh ah hi chuan cheng 10 zel chawi thung tur a ni.