General Election to Village Council 2015 ni 30.4.2015-a neih tur atana Lunglei District inbuatsaihna kalpui dan enchiang turin SEC-in Observer atana a ruat Pu Hrangtawna, IRTS chu nimin khan Lunglei a rawn thleng a. Vawiin khan DC/DEO Pu Ashish Madhaorao More, Addl DC Pu Rothuama, Election Officer Pu Mark Lalthanliana bakah Election kaihhnawih officers hrang hrangte te chu Observer hovin DC’s Conference Hall-ah meeting an nei.

Lunglei District Observer Pu Hrangtawna chuan mipui rorelna sorkar awmna reng rengah inthlan chu banbul ber a nih avangin ngaih pawimawh ber a ni a, tuna Mizoram Village Council inthlan tur pawh Sorkar Laipui pawhin a ngaihven reng a ni, a ti. Vanneihthlak takin Mizoramah chuan boruak muanawm tak hnuaiah inthlan felfai takin neih thin a ni a, amaherawhchu hemi avang hian inthlahdah theih a ni lo tiin officers kalkhawmte chu theihtawp chhuah turin a chah a ni. Pu Hrangtawna hi vawiin chawhnuah Tlabung lam a pan ang a, naktukah Tlabung leh a chhehvel khuaah te V/C inthlan tur atana buatsaihna kal zel a enpui dawn a ni. Lunglei DC & DEO Pu Ashish More pawhin hmalak tawh dante a tarlang a.

Lunglei District huamchhungah V/C 145 an awm a, vawiin tlai dar 3:00 thleng Candidate ten hming an pe lut thei thu leh an inhnukdawkna hun atan Arpril ni 16 ruat a nih thu a sawi a. Election RO turte chu training pek vek tawh an nih thu leh Presiding & Polling Officers te tan training buatsaih a nih vat tur thu te a hrilh a ni.

VC Inthlan tur chungchangah Lunglei District khawi hmunah pawh inthlan kaihhnawiha thil pawi thleng tur emaw boruak duhawm lo emaw thleng a nih chuan a hnuaia Phone Nos. ah te a rang theih ang berin hriattir tur a ni :

Election Office Control Room : 0372-2322025 / 2322659

Election Observer : 0-8415924156