Vawiin chawhnu dar 2:00 khan Serchhip DC Conference Hall-ah Lok Sabha MP Election lo awm tura Election Official Team hrang hrangten an hriat tur leh an tih tur pawimawhte inhrilhhriatna hun an neih a ni.

Pu Chuauhnuna, Deputy District Election Officer chuan, nikum kumtawpa MLA Election neih takah khan Official Team hrang hrang ten an mawhphurhna tha takin a hlen tlang tih sawiin lawmawm a tih thu a sawi a. Kumin April Ni 11-a MP Election lo awm tur atan pawh hian Election Official Team hrang hrang- Sector Officer (SO), Assistant Electoral Officer (AERO), Account Team, Flying Squad (FS), Video Surveilance Team (VST), Static Surveilance Team (SST) leh Election atana thawk zawng zawngte chu theihtawp chhuah leh turin a sawm a, MLA Election-a an mawhphurhna ngai ang deuh vek pek leh an nih thu a hrilh hlawm a ni.

He hunah hian Pu R. Vanrengpuia, Nodal Officer, Election Expenditure leh  SDO(Sadar) Serchhip ni bawk chuan  MP Election  atana Team hrang  hrangte hnathawh tur chanvo leh an hriattur pawimawh te  a zirtir a. Zawhna leh chhanna hun hman niin, sawiho ngai te an sawiho bawk.