Vawiin chawhma dar 10:30 khan Aizawl District Deputy Commissioner leh District Election Officer nibawk Dr. Franklin Laltinkhuma hovin, Mizoram General Election 2013 result puan dan tur Pu Lalchungnunga, Additional Deputy Commissioner; Pi Lalchhandami, Election Officer leh Pu David L. Thangliana, Deputy Director, Information & Public Relation Department aiawhte chuan an rel ho.

Ni 9.12.2013-ah result hi Aizawl District tan chuan Pachhunga University College (PUC)-ah Hall pathum (3) siamah Table pariat (8) zel hmanga chhiar tur a ni a, round 1 chhiar zawh apiangin vote hmuh zat Returning Officer in a puang thin anga, hei hi mipui hriatah I&PR Department chuan Media Centre, PUC hmun atangin a puang zel dawn a ni.

Aizawl District-a Constituency hrang hrang bakah District dang result pawh PUC hmuna Official Media Centre (OMC) hian dawngin a puang chhawng zel bawk ang.

PUC hmuna OMC hian I&PR Directorate hmunah result hi pe chhawngin, I&PR Media centre hian mipui hriatah an puang bawk dawn a, hmun hrang hrang atanga Election Result hre duh te chuan I&PR Media Centre Phone No. - 0389-2326163 leh 0389-2323206-ah hian zawh theih a ni ang.

LPS Vision leh Zonet Cable T.V ten Aizawl District bik vote chhiar result hi live in an tihchhuah theih beisei a ni bawk.