Chhiat rupna thlen thulha chet lak dan ruahmanna bu ‘State Disaster Management Plan’ leh Aizawl District huam chhunga hmun hrang hrangte him leh him loh leh chung hmun te derthawn dan zirchianna map bu ‘Hazard Risk & Vulnerability Analysis of Aizawl District’ tlangzarhna programme chu vawiin khan Secretariat Conference Hall-ah Disaster Management & Rehabilitation Department in an buatsaih. Heng lehkhabu pahnih te hi Pu P.C. Lallawmsanga, IPS, Principal Secretary, DM &R chuan a tlangzarh a, programme hi Pu Sangdingliana, MCS, Addl. Secretary, DM & R in a kaihruai a ni.

Pu P.C. Lallawmsanga chuan state tlem te chauhin State Disaster Management Plan, National Disaster Management Authority (NDMA)-in a phut ang an nei a, Mizoram chu a nei awm chhun tlem te zingah kan tel ve chu a lawmawm a ni, a ti. Tun hma chuan chhiatrupna a thlen hnua chet lak dan leh chhawmdawlna dah pawimawh a ni thin a, mahse tunah chuan chhiatrupna thleng thei laka inven dan leh hemi lama inzirtirna a pawimawhzia leh a tul zia hriain, Sawrkar pawhin chu chu ngai pawimawh in hma a lak chhoh mek zel thu a sawi.

Pu Lallawmsanga chuan chhiatrupna thlen hun a hriat thei lova, invenna lamah zirtirna pek leh inthlahdah loh a pawimawh a ni, a ti. State Disaster Response Force (SDRF) chungchang sawiin Principal Secretary chuan SDRF chu an tangkai hle in an pawimawh a, Laipuitlang chhiatna ah te khan an hnathawh leh an inpekna te kha a fakawm a ni, a ti bawk.

State Disaster Management Plan leh Hazard Risk & Vulnerability Analysis of Aizawl District bu te hi Mizoram Remote Sensing Application Centre (MIRSAC) buatsaih a ni a. Heng bu a thil pawimawh zual tarlan te sawifiahin, Dr. R. K Lallianthanga, Project Director, MIRSAC chuan hun a hmang bawk.

Chhiatrupna thlen thulh a chet lak dan kawngah te, chhiatrupna lakah inven dan kawng te, SDRF volunteers training kawngah te leh National School Safety Programme hnuaiah te DM& R Department chuan hma an lo chho mek zel a ni.

Tun dinhmun ah hian police battalion hrang hrang ami SDRF volunteers mi 425 an awm a, tun sawrkar kum chhung hian mi 120 dang train tir leh tur a ruahman a ni.