1885/2026-2027

Lunglei, 2026 Thlazing ni 20: Electoral roll en nawn runpui, Special Intensive Revision (SIR) 2026 kalpui mekah vawiin khan Lunglei District tana Electoral Roll Observer Dr Lalhriatzuali Ralte (Secretary, Labour, Employment, Skill Development and Entrepreneurship Department & Chief Executive Officer, Mizoram State Health Care Society) chuan a ṭum hnih nan Lunglei tlawhin, electoral roll siam ṭhat chungchanga hma lakna hrang hrang a enpui.

Electoral Roll Observer ho hian Circuit House-ah Lunglei District-a SIR kalpui dan thlir ho niin, District Election Officer Pi Navneet Mann leh Election Officer Pi Lalhruaitluangi te chuan Observer hi SIR kalpui meka Lunglei District dinhmun tlangpui an hrilhfiah a. Observer chuan Lunglei District-a Assembly Constituency paruk – 30-Lunglei North, 31-Lunglei East, 32-Lunglei West, 33-Lunglei South, 34-Thorang leh 35-West Tuipui-a Electoral Registration Officer (ERO) leh Assistant Electoral Registration Officer (AERO)-te chu a mal mala kawmin, an bial chhunga hearing kalpui dan leh constituency dinhmun a sawipui bakah, lehkha pawimawh hrang hrangte a enpui a. Tluang tak leh hlawhtling taka SIR kalpui a nih theih nana hma lak zui zel dan tur te an sawi ho bawk.

Electoral Roll Observer Dr Lalhriatzuali Ralte chuan DEO kaihhruaina hnuaia Lunglei District-a election official-te, ERO leh AERO-te, Booth Level Officer (BLO)-te, tlawmngai pawl hrang hrang leh political party-te'n SIR hlawhtlinna tura mahni zawn ṭheuhva hma an lakna chu fakawm leh lawmawm a tih thu a sawi a. Electoral roll-a inthun thar, inpaih, insawn leh siam ṭhat chungchangah ERO leh AERO-te'n theih tawpa fimkhur leh ulukin lehkha pawimawh an enfiah bakah, a diltute anmahni ngei hmaichhana kawmin hearing an kalpui tih sawiin, vote nei theite electoral roll-a an chuan ngei theih nan leh vote nei thei lote paih an nih theih nana theih tawp an chhuah chu chhuanawm a tih thu a sawi a. BLO-te pawhin theih tawp chhuahin, NGO leh political party te thawhpuina leh ṭawiawmna pawh a ṭha hle tih sawiin, lawm thu a sawi a. ERO-te hma lakna chu felfai leh lungawithlak hlea a hriat thu sawiin, electoral roll pawh tluang tak leh dik leh felfai taka tihchhuah theih a nih a beisei thu a sawi a. ERO-te'n tlawmngai pawlte nen uluk taka an tih tawh chu dik leh rin tlak tawk tura ngaih a nih thu leh ERO-te thu tlukna chu thu tawp a nih thu sawiin, lungawi lo leh sawi duh neite erawh chuan dan angin thuneitu sang zawkah an thlen (appeal) theih thu a sawi.

Lunglei District-a Draft Electoral-a hming chuang mi 98,808 aṭangin mi 21,549 (no mapping 2,261; mapping with discrepancies 18,441 & others 847) chu ERO leh AERO-te hmaah an nihna finfiah turin hearing tura kohna (notice) pek niin, Lunglei District-a polling station 181 awmah ERO leh AERO-te'n polling station tinah kal chilhin hearing hi an zo vek tawh a. Hearing-ah hian hearing notice pekte bakah, July 4 – August 4, 2026 inkar chhunga electoral roll-a inthun thar, inpaih, insawn leh siam ṭhat dilna lutte chu endik nghal a ni bawk a. Lehkha pawimawhte chu District Election Office-ah endik leh digitise mek niin, September ni 7, 2026-ah Final Electoral Roll chu tihchhuah tura ruahman a ni.