1884/2026-2027

Aizawl, the 20th August, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) hovin vawiin khan State Level Ex-Servicemen Rally (ESR) chu Dawrpui Multipurpose Centre, Aizawlah hman a ni a. He hun hi Home Minister Pu K. Sapdanga chuan a telpui bawk.

Larsap General (Dr) Vijay Kumar Singh chuan a hun tam zawk sipai thuam bela a lo hman tawh thu sawiin, ex-servicemen leh an chhungte nena hun hman ho chu nuam a tih tak zet thu a sawi a. Mizoram ex-servicemen-te tluka inchei nalh leh felfai India ramah a la hmuh ngai loh thu sawiin, hei hian inthununna tha a entir a, in chhawmnung zel pawh ka beisei a ti a. Mizote chu sipai an tan lai atanga pension hnu thleng pawha entawntlak tak an nih thu sawiin, state sawrkar chu a theihna leh tulna zawn apiangah hmang tangkai thin turin a chah a. India ram hmalam hun hriltu pawimawh tak thalaite tha taka kaihhruai a tul thu sawiin, ex-servicemen-te chu an tawnhriat leh ram hmangaihna thinlung hmanga thalaite kawng dika kaihruai thin turin a chah a ni.

Larsap chuan ram leh mipuite him nana theihtawp chhuah thintu ex-servicemen ten ngaihven hlawh lo ni a an inhriat loh nana an hamthatna ngaihven zui zel chu mitin mawhphurhna a nih thu a sawi a. Sipai chhungte inpekna pawh hmuh hmaih theih a nih bik loh thu sawiin, "Sipai aiin an inpekna a nep bik lo, an inghahna bulpui leh a phena theihtawp chhuahtute an ni. Ram ri venghimtu sipai leh an chhungte ngaihsak hi ram pum mawhphurhna a ni", a ti a. Rally chu ram venghimtute an pension hnuah khawhara siam lo tura intiam thar lehna ni se a duh thu a sawi bawk.

Home Minister Pu K Sapdanga chuan ram tana an hun hlu tak hlantu ex-servicemen-te leh anmahni tawiawm tlat thintu chhungte chhuanawm a tih thu sawiin, an service chhungin ramin a mamawh phawt chuan zahzel an siam ngai lova, an pension hnuah pawh inthununna, rinawmna leh inpekna nen khawtlang tan hna an thawk chhunzawm a, khawtlang tana mi hlu tak an ni, a ti a. Mizo Tlawmngaihna leh sipai rawngbawlna chu midang dah pawimawh hmasaka innghat tlat a ni tih sawiin, hemi a nih avang hian ex-servicemen-te hi tlawmngaihna pholangtu tha berte an ni, a ti a. Home Minister chuan Mizoramah muanna leh himna a awm zel theih nan mipui leh sipai inkarah inremna leh thawhhona tha chhawmnun a pawimawh tih sawiin, ex-servicemen-te chu mipui leh sipai inkara thawhhona tha a awm theih nana mi pawimawh tak an nih thu a sawi a. Ex-Servicemen leh an chhungte hamthat nan Mizoram sawrkarin a tul anga hma a lak zel dawn thu a sawi bawk.

Rally pual hian ex-servicemen leh an chhungte tan Multi Speciality Medical Camp buatsaih a ni a. Heng bakah hian Larsap chuan ex-servicemen mi hmingthate chawimawina a hlan bakah harsatna hrang hrang avanga ex-servicemen leh an chhung tanpui ngaite hnenah chhawmdawlna a hlan nghal bawk.

He hunah hian Brig V Vidyashankar, Dy IG, IGAR (E) chuan kalkhawmte lawmna thu sawiin, Maj Gen Subhankar Basu, GOC, 57 Mountain Division; Maj Gen Manas Chatterjee, VSM, MG Medical, Eastern Command leh Padma Shri C. Kamlova, ex-servicemen-te hnen atangin thusawi ngaihthlak a ni a. Surg Lt Cdr (Retd) Lalnuntluanga, Director, Sainik Welfare & Resettlement, Mizoramin lawmthu sawiin hun hman a khar a ni.