1349/2026-2027

Lunglei, 2026 Vawkhniahzawn thla ni 9: Electoral roll en nawn runpui, Special Intensive Revision (SIR) 2026 kalpui mek chungchangah vawiin khan Electoral Roll Observer Dr Lalhriatzuali Ralte, IAS, Secretary, Labour, Employment, Skill Development and Entrepreneurship Department & Chief Executive Officer, Mizoram State Health Care Society chuan Lunglei District chhunga polling station pali – Lungsen-I, Lungsen-II, Tuichawng-I leh Tuichawng-II te tlawhin, electoral roll en nawn kalpui dan a hmunah a enfiah.

Electoral Roll Observer hi District Media Assistant Nodal Officer (DMANO) Pu Lalruatfela, Sub-Deputy Commissioner chuan ṭawiawmin, 35-West Tuipui Assembly Constituency (AC)-a Assistant Electoral Registration Officer (AERO) Pu Lalhruailiana Zote, Lungsen Block Development Officer leh official dangte'n an lo dawngsawng a. 34-Thorang AC hnuaia Lungsen-I leh Lungsen-II polling station tlawhin, 35-West Tuipui AC hnuaia Tuichawng-I leh Tuichawng-II polling station a tlawh bawk a. Polling station hmunhma leh dinhmun a enfiah bakah, AERO, Booth Level Officer (BLO) leh Additional Booth Level Officer (ABLO) te nen SIR kalpui chhunga hma lakna hrang hrang leh harsatna te, electoral roll dik leh felfai a awm theih nana ruahmanna hrang hrangte an sawi ho nghal.

Electoral Roll Observer Dr Lalhriatzuali Ralte chuan electoral roll dik leh felfai a awm theih nana election official-te, ERO, AERO, BLO leh Additional BLO te bakah, political party leh an ai awh Booth Level Agent (BLA) te, Village/Local Council leh tlawmngai pawl hrang hrangte thawh hona chu lawmawm a tih thu a sawi a. Claim & objection hun hawn meka dilna lutte ching fel tura hearing neih hunah pawh electoral roll-a chuang tur dik takte chauh roll-ah thun an nih theihna tur leh vote nei theite kim taka thun an nih theih nan fimkhur tur leh theih tawp chhuah tlang zel turin mawhphurtute a chah.

Special Intensive Revision, 2026 kalpui mekah hian draft electoral roll chu July ni 4, 2026 khan tihchhuah niin, Lunglei District-a assembly bial paruk – Lunglei North, Lunglei East, Lunglei West, Lunglei South, Thorang leh West Tuipuiah vote nei mipa 48,918 leh hmeichhia 49,890, an vaiin mi 98,808 awmin, Lunglei District aṭanga sipaia ṭang service voter-a inziak lut mi 478 an awm bawk a. India khua leh tui, July ni 1, 2026-a kum 18 tling chinte tan August ni 4, 2026 thlengin electoral roll-a inziah luh thar, inpaih, insawn leh siam ṭhat dilna hun hawn a ni a. Final electoral roll chu September ni 6, 2026-a tihchhuah tura ruahman a ni.