1948/2026-2027

Siaha, the 27th August, 2026: Vawiin khan DC Conference Hall, Siaha-ah Pu K. Lalthawmmawia, IAS, Electoral Roll Observer for Siaha District leh Commissioner & Secretary, School Education leh Sports & Youth Services nibawk hovin a tum hnihna atan Special Intensive Revision (SIR) 2026 kalpui dan enletna leh sawihona neih a ni.

He thutkhawm hi 39-Saiha (ST) AC Electoral Registration Officer (ERO) leh Deputy District Election Officer ni bawk Pu Abraham Beirazi Khithie kaihhruaina hnuaiah neih a ni a, Election Officer Pu Vabeimozachhi Chozah chuan SIR kalpui meka District chhunga hmalakna hrang hrang report a pe a ni.

SIR Electoral Roll Observer Pu K. Lalthawmmawia chuan Roll buaipui chu thil namai lo tak a ni a, Electoral Roll felfai leh thianghlim a awm theih nana thawktute zawng zawng chungah lawmthu a sawi. Kawng tinrenga tawiawm thintu leh sulsutu pawimawh tak Political Party leh NGO hrang hrang hruaitute, a bik takin MSO leh MTP chungah leh rim taka thawk thin BLO te chungah lawmthu a sawi bawk.

Mipui thlan Sawrkar siam tur chuan inthlanna thianghlim neih a ngai a, Electoral Roll felfai leh dik neih chu inthlanna thianghlim innghahna a ni a ti. Election Commission of India (ECI) pawhin a ngai pawimawh hle a,  kumtluanin Continuous Updation neih thin niin Summary Revision bakah kum 20 danah Special Intensive Revision a buatsaih thin a ni, a ti.

Siaha District chu International Boundary hrula awm ani a, India khua leh tui nilote nen inhnaih te a awm a nih avangin fimkhur hle a tul a. Ram dang mi ten Vote an neih loh nan fimkhur taka theihtawp chhuah a tul a ni, a ti. SIR kalpui kawnga harsatna emaw vuivaina emaw nei an awm chuan inthlahrung hauh lova a hnena thlen turin a chah a, Final Electoral Roll tluang taka tarchhuah a nih theih nan theihtawp chhuah chhunzawm zel turin a chah bawk a ni.

SIR 2026 kalpui mekah hian Siaha District chhungah Electoral Roll thenfai runpui neih mek a ni a, India khua leh tui kum 18 tling te Roll a dah luh leh paih ngaite paih niin hmalakna runpui neih mek a ni.

•  Form 6 (New Addition) thehluh zat: Mi 1752 [ 39-Saiha AC atangin mi 837 leh 40-Palak  AC atangin mi 915] 

•  Form 7 (Deletion) thehluh zat: Mi 48 (39-Saiha ST AC atangin mi 25 leh 40-Palak ST AC atangin mi 23)

•  Siaha District a Assembly Constituency pahnihah hearing zawh fel tawh a ni a. Notice pek (notice generated) hi an vaiin 11850 niin 39- Siaha ST AC ah 6048 leh 40- Palak ST AC ah 5802 an ni. DEO, ERO leh AERO ten dik tawk lo (ineligible) a an ngaih chu an vaiin mi 415 an ni a (39-Saiha ST AC atangin 195 leh 40-Palak ST AC atangin 220). Hei hi za zela chhutin 39-Saiha ah 3.22%, 40-Palak ah 3.79% niin District pumpui huapin 3.50% a ni.