No.6822/2020-2021

Dated Champhai, the 9th December, 2020: Champhai District chhunga Special Summary of Photo Electoral Roll 2021 kalpui mek endik tura Election Commission of India (ECI) in a ruat Electoral Roll Observer Pu R. Zarzosanga, IAS, Secretary, Land Revenue & Settlement hovin vawiin khan Special Summary of Photo Electoral Roll 2021 kalpui mek chungchang sawihona leh inrawnkhawmna DC Conference Hall-ah neih a ni.

Pu R.Zarzosanga chuan Special Summary of Photo Electoral Roll 2021 kalpui mek tluang leh felfai taka kalpui anih theihna tura enfiah tura ECI in a ruatna bawhzui anih thu sawiin, zawhna nei leh rawtna thlen duh neite tan a inhawn reng thu a sawi a.  Electoral Roll hrisel leh felfai tak neih anih theihna turin ECI in theihtawp chhuaha tan a lak thin thu sawiin, Electoral Roll felfai leh hrisel neih theihna kawngah Political party leh NGO te tawiawmna a pawimawh thu a sawi a. Inrawnkhawmna hun ngaipawimawha kal political party aiawhte chungah lawmthu a sawi a ni.

District Election Officer Pi Maria C.T Zuali,  Champhai Bawrhsap chuan ramri depa awm Champhai district chhungah Special Summary of Photo Electoral Roll fimkhur leh uluk taka kalpui angaih thu sawiin, Voter’s ID chu document rintlak leh hman tlanglawn tak anih avangin a siam kawngah uluk lehzuala hmalak a ngai a ni, a ti a.  Birth Certificate leh document pawimawh dangte a lem siam manchhuah an awm thin thu leh dan anga na taka hrem thin an nih thu pawh sawiin, district administration chuan document lem siam leh hmangte chhuichhuaka an chungah dan anga   hremna a lekkawh zel dawn thu a sawi bawk.

He hunah hian Pu Lalnunfela Chawngthu, Election Officer, Champhai District chuan Special Summary Revision of Photo Electoral Roll kalpui meka hriat tur pawimawh leh hmabak awmte a sawifiah a. Electoral Roll felfai tak neih anih theihna turin hun bituk  chhungin documents dik tak nena hmalak  angaih thu a sawi a. Dilna lutte chak zawka chinfel anih theihna turin a theih chinah hearing neiha chinfel  nghal zel anih thu pawh tarlangin, tun dinhmunah form 6 kaltlangin lut thar tur dilna 772, form 7 hmangin paih dilna 170, form 8 kaltlangin siamthat dilna 182 leh form 8 A hmangin insawn dilna (Constituency khat chhungah) 60 lutte chinfel tawh a ni,  a ti a. Hearing neihna khua a lo awm remchang lote tan pawh pan mai theih reng an nih thu a sawi a. Document lem siamchawp dapchhuah kawngah  DRO Office Champhai nena tangtlangin nasa taka hmalak a ni a, nikumah document lem 52 an man thu leh dan anga hmalak anih thu a sawi a. Kuminah pawh document lem siamchawpte dapchhuah kawngah uluk taka enfiaha hma an lak  chhunzawm zel dawn thu a sawi bawk.

Special Summary Revision of Photo Electoral Roll 2021 atan  hian qualifying date chu January Ni 1, 2021 a ni a, hemi ni a Kum 18 tling hman tur India khua leh tui (citizen) dik takte chuan Electoral Roll-ah luh an dil thei ang. Hemi rual hian siam that ngai siam, paih ngai paih leh insawn duhte siam fel theihna hun pawh hawn reng a ni. Special Summary Revision of Photo E/Roll 2021 hnuaiah November Ni 16, 2020 atanga tanin December  Ni 15, 2020 thleng  hian Claims and Objection hun; Electoral Roll-a inthun, paih, insawn leh siam that,  dilna thehluh theih hun hawn mek a ni a. Ruahman dan chuan dilna lutte January  Ni 10, 2021 hmain chinfel vek hman tum a ni a. January Ni 14, 2021 atangin database-te siam that leh supplement-te chhutchhuah vek hman tum a ni a, Electoral Roll siam that leh a thar ber ni tur chu January Ni 20, 2021 ah tlangzarh tum a ni.