No.6821/2020-2021

 Aizawl, 9th December, 2020 : International Science Fair, Expo Mexico 2020 neih mekah India ram aiawhin Mizo zirlai pahnih R.Lalnuntluangi leh Lalhruaitluanga St Paul's HSS-a class XII zirlaite an tel a. Nimin tlai dar 5 khan Expo Mexico 2020 ah hian an project siam te online-a present in zawhna leh chhanna hun an hmang nghal a ni.

R.Lalnuntluangi hian a project-ah Areca Husk (kuhva kawr) atanga paper siam chhuah dan a hmang a. Kuhva kawra cellulose leh a kawr hnip lai lak khawm atanga paper siam dan a entir a, India kuhva leh Myanmar kuhva kawr te lakhawmin a khaikhin bawk a ni.

Lalhruaitluanga hian thingpuife a antioxidant awm dan project-ah hmangin Green tea chu antioxidant awm tamna a nih dan te, Mizo thingpuife Ziksen leh Darzo te chu a that dan leh tihlar zel tlak anih dan te a pho lang ve thung a ni.

Heng Mizo zirlai pahnihte hi Science Teachers Association Mizoram STAM-in an tirh chhuah te an ni a. STAM hian Samagra Shiksha te nen tangdunin Mizoramah Children Science Congress an buatsaih a, District level-a intihsiak hnuah state level intihsiakna neih a ni a,  heta zirlai titha thlan chhuahte chu National Children Science Congress-ah Mizoram aiawh tura tirh an ni a. National-ah hian state leh UT atanga zirlai thiam thlan chhuah ten inelna an nei leh a. Zirlaiten an project siam leh sawifiahna atangin Mizo zirlai pahnihte hi India aiawh tura thlan an ni ta a ni.

Heng zirlai thlan chhuahte hi Foundation for Global Science Initiative FGSI scientist-ten an duh duh zawtin interview an lo neihpui leh a, chumi hnuah chuan Expo Mexico 2020-ah hian India ai awh tura tih an ni ta a ni.

Zirlai pahnihte Guide teacher hi Vanneihsangi Tochhawng St Paul's HSS-a zirtirtu a ni a. Expo Mexico 2020 neih mek hi tun thla ni 12 thleng awh tur a ni a, a buatsaihtute hma ah vawi khat presentation neih leh an la hmabak a ni.

School Education Minister Pu Lalchhandama Ralte chuan Mizo zirlai pahnih ten India ram zau tak leh mihring tluklehdingawn khat chuang aiawha International Science Fair-a project an pho chhuak thei chu lawmawm a tih thu leh chhuanawm a tih thu a sawi a. An kal zelna turah Mizoram tan mai ni lo India ram tan chhuanawm taka ke  pen zel turin duhsakna a hlan a ni.