No.6820/2020-2021 

Vawiin khan I&PR Director Pi Lallianpuii hovin a pisa-ah Aizawla Electronic Media hotute nen inkawmhona neih a ni a. Doordarshan Kendra, All India Radio, LPS Vision Production leh Zonet Cable TV Pvt. Ltd. hotute an tel a ni.

I&PR Director chuan Mizoramin COVID-19 hripui leng vanga hun khirh tak a tawh mek laia Electronic Media ten tha taka sawrkar an thawhpui avanga lawmthu sawiin, hmanhmawh leh hnawhsarum taka mipuite hriattur thuthar leh chanchintharte, mipui zirtirna programme te tichhuak tura inthlahrung taka an ngen thin pawha tha taka an lo dawngsawng leh an lo ngai pawimawh thin chu lawmawm a tih thu a sawi a. Sawrkar Press Release mai bakah, message pawimawh, Talk Show etc. a awm chang pawhin
programme an lo ruahman lawk sa te pawh thlak danglam thlak danglam phah hiala mipuite tana rawngbawlna a ni tih hria a an lo insiamrem thin zel chu lawmawm a tih thu a sawi a, thawhhona tha tak an neih chhunzawm zel a beisei thu a sawi bawk a ni.

Electronic Media hotute pawhin mipuite rawngbawlna kawnga sawrkar hmalaknaah an inhawng hle a ni tih an sawi a, an theih ang tawk tawkin anmahni irawm chhuak pawhin hma an lo la ve thin tih an sawi a ni.

Vawiin inkawmhona ah hian mipuite tana tha tura rawngbawlna kawnga thawhhona tha an neih chhunzawm zel theih nan leh awmze nei zawka hmalak a nih zel theih nana pawimawh chi hrang hrang an sawiho bawk a ni.

Attachment

  • Loading attachment...