3218/2024-2025

Dated Hnahthial the 26th November, 2024: Vawiin khan Hnahthial DC Meeting Hall-ah Electoral Roll Observer, Pi Zodingpuii, Secretary, FCS&CA Dept. chuan Hnahthial block chhunga political party President te, Hnahthial Sub-Hqrs YMA President bakah Mizoram Journalist Association (MJA) member-te thutkhawmpuiin Hnahthial District-in electoral roll kaihhnawiha harsatna an neih hrang hrangte sawihona hun a hmanpui.

Thutkhawmnaah hian Electoral Roll Observer hnenah MJA members, Sub-Hqrs YMA leh party President te chuan e-roll kaihhnawiha Hnahthial District tana harsatna awmte leh buaina awm thei te an thlen a. Thingsai, Cherhlun leh Border area a e-roll a inthun fimkhur a ngaih lehzual thu te, chanchinbu chhuak te election lam kaihhnawiha hman tangkai zawk an nih dan tur te bakah YMA, VC leh NGO tin ten khauh zawka e-roll a inthunna an kalpui theih dan tur te sawihona neih a ni.

Pi Zodingpuii chuan e-roll a inthun mai mai kan chin avangin Mizote chu hnam dangin min luhchilh nasat tawh thu sawiin Hnahthial District chu Mizo khua leh tui dik tak tamna la ni mah se an fimkhur loh chuan nakin lawkah hnam dangin an rawn la chim buai thuai a hlauhawm thu a sawi a. Mi rilru tihnat hlauh vang mai mai te a electoral roll a in thun hi thil tih chi loh mai ni lovin dan phal loh hulhual anih avangin khawng taka kenkawh anih theih nan officials te, party mi leh sa te, YMA, VC leh MJA ho te chu tanrual a pawimawh thu a sawi a. Electoral roll ah induhsakna tel lo leh dik taka inthun anih theih nan e-roll kaihhnawiha inhnamhnawih zawng zawngte chu hnam humhalh nan dik taka kalpui theuh turin a sawm nghal bawk a ni.

Thutkhawmnaa tel, Bawrhsap Pi Rita Lalnunmawii Pachuau chuan Roll Revision hi thil pawimawh tak mai, kan hnam hnuk khawih thil anih thu sawiin sawrkar hamthatna dil dawn pawn e-roll atanga en vek anih thin thu a sawi a. NGO leh khawtlang thiltihah ram dang mi chu eng ang pawn lo inhmangin thanhnem lo ngai mah se, e-roll a thun phah nan hman loh tur anih thu sawiin inkhawngaih vang leh induhsak vanga e-roll a inthun ngawt hi thil tih miah loh tur anih thu a sawi a ni.

Electoral roll a thun theih chin leh chin loh hriat chian anih theih nan India danpui (Constitution) in India mi leh sa dik tak (Citizens) a tih chin te hriat chian theihna tur inziahna, circular chu YMA, VC leh electoral roll a inhnamhnawih zawng zawngte bakah mipui nawlpui hriat theih turin chhuah ni se tiin thutkhawmna chuan a rel a ni.

Thutkhawmnaah hian Pi Esther Leihang, SDO Sadar leh Pu F. Lalrinfela, DIPRO te chu an tel a ni.