Vawiin chawhnu khan Pu Ashwini Kumar, IAS, Commissioner, General Administration Department, Electoral Roll Observer ni bawk chuan Serchhip District-a Electoral Roll Special Summary Revision a rawn enfiah a, chawhnu dar 2:00 khan Serchhip DC Office Chamber ah Election kaihhnawih sawrkar official te, YMA, MJA leh political party aiawhte nen an inkawm khawm a ni.

Pu Ashwini Kumar chuan Serchhip District chhunga Electoral Roll Special Summary Revision kalpui dan chu felfai a tih thu leh lawmawm a tih thu a sawi a, Electoral Roll buatsaih fimkhur a tul zia uar taka sawiin India khua leh tui dik tak nilo te chu engti kawng zawng maha Electoral Roll a telh phal anih loh thu a sawi bawk a ni.

Vawiin meetingah hian Political Party hrang hrang aiawhte pawh tel tura hriattir an ni a, an zingah Indian National Congress aiawhte chauh an tel thei a, Electoral Roll Observer chuan political party te hnen atang leh YMA hruaitute hnen atang Draft Electoral Roll chung changa lungawilohna an neih te zawtin an ni chuan sawisel tur an hriat loh thu leh an lungawi thu in an chhang ve ve a ni. Hei bakah hian Electoral Roll kaihhnawih chungchanga an hriatthiam loh te sawiho niin inhrilhfiah nghal zel a ni bawk.

Report atanga a lan danin, Special Summary Revision neih anih hnu a Serchhip District chhunga MLA Constituency pathuma Electoral Roll dinhmun thar ber chu a tlangpuiin hetiang hi a ni :

Serchhip Constituency ah General Electors 15,525 (mipa-7529, hmeichhia-7996) leh Service Electors 121 (mipa-106, hmeichhia-15), an vaiin Voters 15,646 an awm a, voters te punna zat hi 6.45 % a ni.

Tuikum Constituency ah General Electors 14,416 (mipa-7175, hmeichhia-7241) leh Service Electors 95 (mipa-87, hmeichhia-8), an vaiin Voters 14,511 an awm a, voters te punna zat hi 2.69 % a ni.

Hrangturzo Constituency ah General Electors 14,780 (mipa-7369, hmeichhia-7411) leh Service Electors 90 (mipa-81, hmeichhia-9), an vaiin Voters 14,870 an awm voters te punna zat hi 2.62 % a ni.

Khaikhawmin Serchhip District chhunga MLA Constituency pathumah General Electors 44,721 (mipa-22,073, hmeichhia-22,648) leh Service Electors 306 (mipa-274, hmeichhia-32), an vaiin Voters 45,027 an awm a, voters zawng zawngte punna zat hi 3.94% a ni.

Serchhip District-ah hian EPIC holder (General Electors) 44,721 (Serchhip-15525, Tuikum-14416, Hrangturzo-14780) an awm a, software problem avangin EPIC Card tihchhuah thar turah thlalak lang thei lo a awm nual dawn a, Final Electoral Roll tihchhuah anih hnu ah heng thlalak lang theilo te hi an thla lak that sak leh vek an nih dawn thu Pi K.Vanlalruati, MCS, Electoral Officer-in a sawi a, EPIC siamtha duh tan Rs. 25/- chawiin a siamthat reng theih thu a sawi bawk.

Final Electoral Roll kimchang hi January ni 15, 2013 ah mipui vantlang en theih turin tarchhuah a ni ang.