Vawiin chawhma dar 11:00 khan Pu P.Lalchhuanga, IAS, Director, School Education Department, Electoral Roll Observer ni bawk chuan Serchhip District-a Electoral Roll Special Summary Revision, 2013 kalphung a rawn enfiah a, Serchhip DC Office Chamber ah District Election Officer, Bawrhsap ni bawk Pi Juhi Mukherjee, IAS te, Election kaihhnawih sawrkar official te, YMA, MJA leh Political Party hrang hrang aiawhte nen an inkawm khawm a ni.

Pu P.Lalchhuanga chuan Electoral Roll siam chungchanga Election official te, NGO te leh Political Party hrang hrangte hmalak dan rawn enfiah anih thu leh, an thil tihsual lai chauh rawn zawng anih loh thu sawiin, tha tak leh felfai taka hmalak anih theih nana ruahmanna siam pui chu a tum ber anih thu a sawi a, a hmuh chinah Serchhip District chhunga Electoral Roll Special Summary Revision kalpui dan chu felfai a tih thu leh lawmawm a tih thu a sawi a, mipuiten vote thlak theihna ‘Right’ an neih, dik taka an hman tangkai hi Democracy lungphum anih avangin a pawimawh hle a ni a ti a, Electoral Roll buatsaih fimkhur a tul zia uar taka sawiin India khua leh tui dik tak kum tling te Electoral Roll a an chuan kim ngei theih nan fimkhur taka leh taima taka hnathawh a tul a ni a ti bawk.

Electoral Roll Observer chuan Election Official te chu an hna ngaipawimawh thar lehzual tura chahin, Election kaihnawih a chanvo nei official zawng zawngte chu Election duty a an kalin Election Commission-ah deputation an kal an ni tih in hria a, khawtlai (delay) leh hlawhchham (failure) awmlo tura theihtawp chhuah turin a ngen a, Election Officials-te chu an hnuaia election chungchang buaipuia thawktute zawng zawng uluk taka vil a, pui thin turin a chah bawk.

District Election Officer Pi Juhi Mukherjee, IAS pawhin polling station hrang hrang a Sex Ratio inthlau lutuk te, Age Group hrang hrang performance inthlau te a awm anih chuan uluk taka zirchian a siam that dan ngaihtuah a pawimawh dawn ani a ti a, mitthi leh pembo te Draft Roll atanga paih loh an tam thin chuan inthlan hunah voters turnout (vote thlak zat) percentage a tih hniam nasat thin avangin, performance chhia anga lan a awl thin a, hemi lamah hian chak leh zuala hma la turin NGO te leh Political Party hrang hrangte a ngen a, Election Commission of India in Polling Station tina Booth Level Agent dah tura Political Party hrang hrangte dah tura a ngenna chu tihlawhtling turin Political Party te a ngen bawk.

Draft Roll tharah hian Polling Station 10 siam belh niin, hmun thenkhatah voters te vote thlakna hmun pawh siam rem a ni a, hemi chungchanga mipuite lo bengvar turin Political Party te leh NGO te ngen an ni a, Electoral Roll a thun thar duh tan July ni 15, 2013 thleng hun hawn niin dilna form hi DC Office Election Branch atanga lakchhuah theih a ni. Electoral Roll thara tel thei tur chin chu India khua leh tui dik tak January ni 1, 2013 a kum 18 tling chin an ni a, Election chungchanga zawhfiah duh nei tan DC Office Election Branch ah Hotline no. 1950 (toll free) dah a ni a, man chawi lovin hriatduh apiang zawhfiah theih reng a ni bawk.

Attachment

  • Loading attachment...