Vawiin khan State Level Working Committee, National Foundation for Teacher’s Welfare chu an Chairman Education Minister Pu Lalsawta hovin a office chamber-ah an thukhawm a. Kumtina tih thin angin kuminah pawh Teachers’ Day hmandan tur leh hemi nia zirtirtu tanpui ngaite chhawmdawlna pek dan tur ngaihtuah ho a ni.

Meeting kaihruaitu Education Minister Pu Lalsawta chuan khawvel pumah zirna in ngaihven leh ngaih pawimawh a hlawh mek zel a, khawtlang leh ram siamthat nan zirtirtute hi an pawimawh em em a, chuvangin anmahni Ni bik ‘Teachers’ Day’ ah pawh hian theihtawpa fak leh chawimawi an phu a ni, a ti a. Kumin Teachers’ Day vawi 51-na atang hian College leh Private School-te pawh tel nise tih vawiin meeting-ah hian pawm a ni.

National Foundation for Teachers’ Welfare (NFTW) hi kum 1962 atanga kalpui tawh a ni a, rampuma zirtirtu damlo leh tanpui ngaite chhawmdawlna tura din, NFTW hi ramchhung state tin ten sum an thawhkhawm atanga ruahman thin a ni. Hei bakah hian kumtin Teachers’ Day-ah hian kawng hrang hrangin mipuite atangin thawhlawm khawn thin a ni a - token flag, car flag, pen leh key chain te zuarin sum tuak a ni thin. Tun dinhmunah chuan Mizoram-a ‘Teachers’ Day Fund’ atan hian Rs.21,85,670/- a tlingkhawm tawh a, ‘Teachers’ Inn Fund’ atan Rs.8,80,540/- a awm bawk a ni. Nikum khan NFTW hnuaia zirtirtu tanpui ngai mi 84 hnenah tanpuina sum hi sem a ni nghe nghe a ni.

‘Teachers’ Day’ pual hian Education Minister chuan DDK/AIR leh Local Cable Tv-ah te Thuchah a sawi ang a. Hemi ni pual hian State/National Teacher Awardees leh zirna lama thleng sang mite sawmin Talk Show pawh buatsaih tum a ni. District tinah ‘Teachers’ Day’ hman dan tur chu D.C. theuhte Chairman-na hnuaiah District Sub-Committee ten sawihova ruahman nise tih rel a ni bawk.