Serchhip District leh Lunglei District Electoral Roll Observer tura Election Commission of India in a ruat Pu Zothankhuma, IAS chuan District chhunga Electoral Roll revision kalpui mek dan enfiahin Serchhip a tlawh a, vawiin chawhma dar 11:00 khan Serchhip DC’s Meeting Room-ah Political party hrang hrang aiawhte, Village Council aiawhte leh Election officials te nen Electoral Roll Revision chungchang sawihovin an thukhawm.

Pu Zothankhuma chuan Electoral Roll Revision ngaihpawimawh a tulzia sawilangin abik takin Political Party te mawhphurhna a sang hle a ni a ti a, Rampawn amite khawngaihthlak tak tak an rawn lut thin a, mizote hi mi khawngaihthei tak kan nih avangin kan lo tuamhlawm thin a, hei hi a that em em rualin rilru fim kan put a ngai ani a ti a, thildangah chuan duhsaka duat tur a ni a, khawtlang leh ram roreltu tur thlanna ah erawh tel tir loh ngam hi a him ber a, political party te pawhin hei hi hria in rilru siam se a tha a ni a ti a; Political party tin te mi leh sa induhthawh hun lai niin mihring a tam thei ang ber Electoral Roll-a thun tura tan kan lak hun lai hian kan ram leh hnam himna tur ngaihtuah a kan fimkhur a ngai a, pawnlam mi te Electoral Roll a kan telh a vote an neih mai chuan reilote ah hotu nihna thlengin an chuh mai thin a hei hi hria a a hun laia ram leh hnam hmangaih a pawimawh a ni tiin fimkhur tur leh dik taka kal ngam turin Political party tin te a chah a ni.

Election Officer Pu Lalhmansanga, MCS pawhin Serchhip District chhunga mipuite hnena vote thlak tur leh Electoral Roll-a tel a pawimawhzia inzirtirna “SVEEP” kalpui anih dan tur te leh thilpawimawh dangte sawifiahin; ruahman ang chuan nakkuma Village Council Election inthlan neih turah tuna Electoral Roll buatsaih lai hi hman tum anih avangin tun hun hi fimkhur angaih lai tak a ni a ti a, political party zawng zawngte chu tha tak leh diktaka hmalak anih theihnana thawhpuiah sawmin, a hnu leha harsatna a awmloh nan Hearing neih hunah pawh Political party tin ten an aiawh “Booth Level Agent” lo ruatfel thei se a duh thu a sawi bawk.

Vawiin thutkhawmah hian Political party aiawhte chuan Roll revision kalpui mek leh a kaihhnawih hrang hranga an thil hriatchian duh te an zawt a, Village Council Election neih huna VC Roll hmang lova Electoral Roll hman aniha harsatna hrang hrang awmthei ni a an hriat chungchanga zawhna an zawhte chu State Election Commission in a ngaihtuah mek thu leh ruahmanna a siam dawn thu in an chhang a ni.

Vawiin thutkhawm hi Serchhip District Election Officer, District Bawrhsap ni bawk Pi Juhi Mukherjee, IAS chuan a kaihruai a, Electoral Roll Observer hian Tuikum, Hrangturzo leh Serchhip Constituency a Polling Station thenkhat te endikin zanin hian Serchhipah a riak ang a, naktukah Lunglei a pan ang.