Nimin khan Lunglei District Level Vigilance & Monitoring Committee chu an Chairman Pu C.L.Ruala, MP (LS) leh Co-Chairman Pu Ronald Sapa Tlau, MP(RS) hovin Lunglei Circuit House Conference Hall-ah an thukhawm a ni. Lunglei HPC Vice-Chairman Pu S.Laldingliana, Parliamentary Secretary Pu Joseph Lalhimpuia leh Lunglei ‘W’ Bialtu MLA Pu Chalrosanga Ralte te pawh vawiin Vigilance Committee-ah an tel ve a. Lunglei DC leh Committee Member-Secretary ni bawk Pu Ashish Madhaorao More chuan Chairman leh Co-Chairman bakah Committee Member zawng zawngte lawmna thu a sawi a. He meeting-ah hian Sorkar Laipui ruahmanna hrang hrang kalpui mek dan thlirho niin, heng scheme/programme kaltlanga hmasawnna hmuh tawh hrang hrangte tarlan a ni bawk.

Committee Chairman Pu C.L.Ruala, MP(LS) chuan sorkar kum kal mek 2014-2015 chhung leh 16th Lok Sabha thutkhawm a nih hnua District Level Vigilance & Monitoring Committee meeting hmasa ber a nih thu leh Committee Guidelines thar pawh duan fel a nih tawh thu a sawi a. He Committee-in a tum ber chu sorkar ruahmanna hrang hrang atana sum lo lut hmandan enfel leh eng chen nge hmalak a nih tawh tih enfiah a ni, a ti. Co-Chairman Pu Ronald Sapa Tlau chuan tunlai khawvelin Human Development Index-a an tehfung pawimawh ber pakhat chu hriselna (health) a nih thu leh scheme hrang hrang kalpuinaah ramngaw humhal leh tihpun ngaih pawimawh nise a duh thu a sawi bawk.

Vawiina District Level Vigilance & Monitoring Committee thukhawm chuan heng Sorkar Laipui ruahmannate an thlir ho a ni :

1. Mahatma Gandhi National Rural Employment Guarantee Scheme(MGNREGS) - Kum 2013-2014 chhung khan Job Card Holder mi 33756 tan ni 78 inhlawhna siamsak a ni a, an hnathawh (works) hrang hrang belhkhawm zat chu 973 a ni. Kumin 2014-2015 chhung hian Job card Holder mi 33840 an awm a, sum release a nih loh avangin ni 3 chiah inhlawhna siam sak a ni a; amaherawhchu October ni 7, 2014 khan Cheng nuai 664 hmuh belh a nih avangin tun thla chhungin MGNREGS hnuaiah ni 7 inhlawhna siamsak hman leh tum a ni. Sericulture Department nen thawhhona (convergence) siamin Lunglei District huamchhungah Mulberry Plantation 214 enkawl mek a nih thu leh Terracing hna hmun 179 laiah thawh mek a nih thu tarlan a ni bawk.

Lunglei District chhunga MGNREGS hnuaia Job Card Holder zawng zawngte chu PM Jan Dhan Yojana hnuaiah Bank account hawnsak turin hmalak mek a ni a. MIS Data Entry hmangin an hmalakna zawng zawngte online-in hmuh theih turin dah a ni tawh.

2. Indira Awaas Yojana (IAY) - Kum 2013-2014 chhung khan Cheng nuai 712.652 sengin In 914 sak a ni a. Kumin 2014-2015 chhungin In 354 sak tura ruahman tum ni nain sum release a la ni rih loh avangin hnathawh engmah a la awm lo thung.

3. Integrated Watershed Management Programme (IWMP) - He scheme hnuaiah hian Lunglei District hi Bial 14-ah then niin a kaihhnawih sorkar department-te bakah AMFU ten an enkawl mek a ni. Kum 2013-2014 chhung khan heng IAY bial 14 atan Cheng nuai 839.357 hman a ni a; kumin 2014-2015 chhung hian Cheng nuai 1097.115 release a ni tawhin hna pawh chak takin kalpui mek a ni.

4. Pradhan Mantri Gram Sadak Yojana (PMGSY) - Kumin April to September, 2014 thleng khan PMGSY hnuaia Block 4 (Lunglei, Hnahthial, Lungsen leh Bunghmun) chhunga kawng siam tura tih sei/thui zawng chu 139.92 Kms a ni a,. Heng zingah Km 65.20 chu zawhfel ni tawhin kawngpui engemawzat siam hna thawh mek a nih thu tarlan a ni.

5. Rajiv Gandhi Grameen Vidhutikaran Yojana (RGGVY) - He scheme hnuaiah hian Unelectrified Villages 23-ah kawlphetha pek tawh a ni a, Partially Electrified Villages 101, Energisation of UE Villages 12 leh Release of Connection to BPL Households 4444 tihhlawhtlin tawh a ni.

A chunga tarlan scheme hrang hrangte bakah Committee Guidelines tharin a duan angin Ministry of Tribal Affairs, GoI hnuaia scheme kalpui mek - National Social Assistance Programme (NSAP), Scholarship & Upgradation of Merit of ST Students, Voactional Training in Tribal Areas leh Eklavya Model Residential School - hmalakna te pawh thlirho a ni a. Social Welfare Department hnuaiah enkawl mek ‘Vocational Taraining in Tribal Areas’ hi nikum 2013-2014 atang khan ruahman tan a ni a, chhungkaw harsa zawkte eizawnna atan Trade hrang hrang - tailoring, beauty culture, electric/electronic goods repair, etc - te zirtir an ni. Lunglei-ah chuan J.B.Building, Chanmari-ah Centre din niin nikum khan mipa 7 leh hmeichhia 38 training pek an ni tawh a, kuminah hian mipa 18 leh hmeichhia 56 te training pek mek an ni bawk. District Level Vigilance & Monitoring Committee hi Guidelines tharin a phut angin nakkum 2015 February thlaah thukhawm leh tura beisei a ni.

Attachment

  • Loading attachment...