Nimin khan Parliamentary Secretary i/c Trade & Commerce Pu Joseph Lalhimpuia chuan UD&PA officials leh Clean Lunglei aiawhte nen Lunglei Sobji Bazar chu a tlawh a, he hmuna bawlhhlawh bawm lian leh septic tank siamthat ngaite a hmunah an enho. Pu Joseph Lalhimpuia hi Pu Ngunlianchunga MOS, AH&Vety. etc leh Pu Zothangliana Parliamentary Secretary i/c H&TE etc. ten an tawiawm a ni.

Parliamentary Secretary Pu Joseph Lalhimpuia chuan Sobji Bazar bawlhhlawh paihna chu sum awmsa awmlo atanga sum pawhkhawm Cheng nuai 2.6 hmangin siamthat hna thawh tum a ni tih a sawi a, karleh atangin he bawlhhlawh paihna hi sak tan a nih tur thu a sawi. Bawlhhlawh paihna siam that a nih chhungin Trade & Commerce truck pahnih chu bawlhhlawh paih turin service tir a ni dawn tih thu a sawi bawk. Lunglei Sobji Bazar building pawh sakthat turin 14th Finance Commission-ah Cheng vaibelchhe 35 hu Project thehluh a ni a, hetih rual hian AOC Bazar sakna tur Rs 35 Cr man hu bawk thehluh tel a ni tih a sawi. Pu Joseph Lalhimpuia chuan Sobji Bazar bawlhhlawh paihna siamthat tur bakah Sobji Bazar toilet chhe tawh tak siamthat dan tur en ho nghal a ni bawk a, Sobji Bazar-a tuiluankawr (side drain) siam that dan tur enho nghal ni bawkin hengte pawh hi a rang thei ang bera hmalak tum a nih thu Parliamentary Secretary hian a sawi bawk a ni.