Vawiin khan Chief Electoral Officer Pu Ashwani Kumar chuan ama office, New Secretariat Complex ah Mizoram a political party hrang hrang aiawh te kawmin Electoral Roll Revision, 2015 kalpui dan tur te a hrilhfiah a. He roll revision ah hian India khua leh tui dik tak, January 1, 1997 hma lama piang January 1, 2015 a kum 18 tling hman tur te chu Electoral Roll(E/Roll) a inthun vek tura hriattir an ni. CEO Pu Aswhani Kumar chuan Party hruaitute hnenah ngenna siam in roll dik tak siam tur leh India khua leh tui ni lo(foreigner-te) thun tel lo turin a chah bakah Electoral roll siamtute an theihna zawn apianga lo pui thin turin a sawm a ni.

Roll revision 2015 kalpui turin Election Commission of India(ECI) chuan State Election Department, Mizoram chu July, 2014 atanga October,2014 thleng inpuah chahna hun a pe a. State Election Department hian inbuatsaih fel thawkhat tawhin ERO/AERO leh BLO te pawh traning an pe tawh a. Electoral Roll te endiktu tur Observer-te pawh ECI chuan a ruat fel tawh a ni.

ECI ruahmanna duan ang chuan :- Roll neih lai tar chhuah hun(Draft Publication) atan Dt.15.10.2014, Inthun thar duhte tana dilna theh luh hun dt. 15.10.2014 atanga dt. 10.11.2014 thleng, Roll a chuangte enfiah leh ngaihtuah hun dt.17.10.2014 atanga dt.30.10.2015 thleng, Political party hrang hrangte aiawh Booth Level Agent(BLA)-te leh NGO-ten a huhova awareness campaign an neih hun atan dt.18.10.14 leh dt.1.11.2014, thun thar leh paih tur enfiah hun tawp ni, dt.20.11.2014, Office lam a E/Roll tihfel hun tur, dt.20.12.2014 leh Final roll tar hun atan dt.5.01.2015 a ni ang.

Tun dinhmunah Mizoram pumpui ah polling station 1126 a awm mek a, 16 siam belh leh in polling station 1142 awm tura ruahmanna siam a ni a. Heng polling station siam thar turte hi Lunglei district ah 9, Mamit district ah 3, Lawngtlai district ah 2, Saiha district leh Aizawl district ah 1 ve ve te an ni.