Vawiin chawhnu khan Pu John Rotluangliana, Minister FCS& CA, Transport, Tourism chuan Champhai a thleng a, Champhai Circuit House ah  sawrkar mi pawimawh ten an lo hmuak.

Amah hmuahna inkhawm Circuit House a neihah hian Minister chuan North East Mega block vanga Mizoram in kan mamawh ei leh bar 60% lakna pui ber Bairabi rel kawng a tawp tak avangin tunah hian khawchhak lam atanga kan mamawh te lakluh dan kawng dap tura kal a nih thu a sawi a, ei leh bara kan mamawh ber buhfai anih thu sawiin tunah hian Mizoram in kan kawl sa buhfai hi ren taka hman in thla thum tla awrh chauh a ni a, Mizote hi thil ti khawm/eikhawm uar hnam kan nih avangin heng ah hian a hlawmin tamtak a kal ral thin bawk a ni tiin tunah hian mega block hi thla ruk chhung tura ruahman ni mahse chu aia a rei chu anih a rinawm avangin tun atanga kan ei leh bar turte kan buaipui loh chuan kan tam a hlauhawm a ni, a ti a. Tunah hian khawchhak lam atanga buhfai lakluh dan tur pawh hi FCI atanga kan lei thinna Rs. 29.81 aia tlawma kan lei theih beisei vangin mizopa takin kan kal dawn a ni a ti. Minister hian a chanpual department dangte pawh an la tlawh tur thu sawiin Transport department bika an hmachhawp zing ami Mizoram District khawpui tina bus service tir dan tur chungchang a tarlang bawk a ni.

Minister hi Pu T.T.Zothansang, Parl. Secy, Pu K.Lianzuala, Chairman KVI Board, Tourism, Transport leh FCS&CA department officers ten an tawiawm a, vawiin tlai hian Zokhawthar Tourist Lodge ah zan an riak anga, naktuk hian Tiddim lam an pan anga, tlaiah zanriak turin Champhai an phei leh ang.