No.789/2021-2022

Aizawl, the 2^nd June 2021 : Engineer-in-Chief, Power & Electric Department chuan Electric Bill pek chungchangah a hnuai a mi ang hian mipuite te hnenah hriattirna a chhuah.  

Covid-19 hrileng avanga Mizoram Sawrkarin Total Lockdown leh hmun tam takah containment area puan a nih avangin  Meter reading lak,  Bill sem leh Electricity Bill Counter hawn chhunzawm theih a ni ta lova. Hemi chhunga Electricity bill siam dan tur leh bill pek dan P&E Department in ruahmanna a siam chu a hnuaia tarlan ang hi a ni e.

1.  A chunga tarlan harsatna vanga Consumers tin te Energy Meter reading lak theih loh ah JERC(M&M) Supply Code Regulations, 2013 (Clause-5.22) tlawhchhanin Meter reading lak theih a nih hun lai thla hnuhnung pathum atanga chawhruala thla khat Unit hmanral zat hmangin Provisional bill siam a ni dawn a. Bill hi thingtlang hmun thenkhata consumers tlem tih loh consumers tam zawk tan Online hmangin pek theih a ni dawn a ni. Provisional bill hi Meter reading pangngaia lak theih a nih leh hmasak berah a tul anga siamrem a ni ang.

2. Bill hi sem chhuah a nih dawn loh avangin consumers tin te Online hmanga Bill pe tura ngen kan ni a. Online a bill pe tur leh bill pek tur zat hre tur hian Consumer number hriat ngei ngei a ngai a, Bill pekna Online portal/Mobile Apps ah Consumer number chhut luhna  tur a awm a, Consumer number chhut luh hnuah bill pek zat tur a hriat theih a ni. Consumer number hi bill body hlui atangin en theih a ni. 

3. Online hmanga bill pe theilo leh pe thiam lo pawhin Mobile phone midang kan recharge tir thin ang deuh hian Electric bill hi midang pek tir theih tho a ni. Midang pe thiam kan pek tir dawn a nih chuan kan consumer number  kan hrilh ngei ngei a ngai thung.

4. Online hmanga bill pe theilo chuan hrileng a ziaawm a Bill counter hawn a nih leh hmasak berah bill hi a hlawmin pek a ngai dawn a. Hrileng avanga harsatna a awm chhunga bill pek theih loh atang hian bill pek loh avanga chawibelh (interest /surcharge) a awm lovang.