Mizoram Electrical Merchants Association ten Value Added Tax ti hniam tura sorkar an ngenna chung chang enfiah leh zirchian a nih mek laia press conference te ko a lungngaihni hmanga mipui tana harsatna an siam hi sorkar chuan pawi a ti hle a ni.

Sorkar chuan ram hmasawnna hna thawh nan chhiah lak mek atang a hmuh belh dan tur a ngaihtuah thin a. Mipuite phurrit lutuk tur siam lova kawng zawn hram a tum thin a ni. Hemi hre reng chung hian India rama Empowered Committee in rampum a rualkhai taka VAT rate hman tur a duan dung zuiin VAT rate hman lai 4% leh 12.5 % te chu 1% ve ve a ti sangin 5% leh 13.5% ah a ti sang a. Electric bungrua phei chu kum 2005 atang khan rate sang zawk 12.5% a dah a ni tawh a; amaherawh chu a electric bungraw zuartute ngenna avangin 2008 ah khan electric bungraw thenkhat hi VAT rate 4% a lak sak an ni.

Electric bungrua te hi ‘packed good’ a ni tlangpui a, Maximum Retail Price inclusive of all taxes’ tih inchhu chu MRP chhunga hralh a ni a. Chutichung chuan kum 2008 a electric bungraw thenkhat VAT rate tihhniam a nih khan a leitu ten MRP thoin an lei a, bungraw leina a hniam chuang lo a ni. Chuvangin he VAT rate tih hniam hian a leitute tan bungraw leina hniam chuang lovin a zuartu leh supplier te chauhin an hlawk pui a ni.

Electric bungraw thenkhat phei chu Mizoram a lak luh ang a lang si State dangin Tax rate sang zawk an hman avang a thenawm state a hralh tak a awm nual a ni tih hriat a ni a. Chuvangin kumin January thla a VAT rate enthat a nih khan electric bungraw thenkhat rate hniam 5 % a dah thin chu rate sang zawk 13.5 a dah chhoh a nih phah ta reng a ni.

Hetiang tho hian thenawm State Meghalaya leh Assam te pawhin electric bungrua te hi chi hnihah thenin rate hniam zawk 5 % a lak turin ‘Industrial Inputs’ category ah an dah a, a bak zawng hi rate sang 13.5 % ah an dah a ni.

Ngun taka thlirin MEMA te thil ngen hi mipuite heu phahna leh ham thatna nilovin anmahni hlawkna lam chauh kawkin a lang a. Mipui leh sorkar chan ai ti tlem tur a nawrna mai a ni zawk a; chubakah mipuite harsatna thlen zawng a dawr khar zawng a nawr phei chu sorkarin pawi a ti hle a ni.