Tukin zing khan Br. YMA Electric veng huaihawtin Electric veng khawtlang hruaitute (NGO's) chuan YMA RUN ah an veng chhunga hmasawnna nasa tak Bialtu MLA Pu Joseph Lalhimpuia, MYC Chairman ni bawk zara an nei chu lawmthu sawina hun an hmang.

Pu Joseph Lalhimpuia chuan Electric veng khawtlangte thawh hona leh inlungrualna tha tak an nei chu lawmawm a tih thu  leh Veng chhungah building pawimawh tak mai sak tur Agri Marketing and training Infrustructure pawh Pathian tanpuina avanga chak taka hmalak a nih thu sawiin  he building sakna tur NABARD atangin cheng nuai 1025.93 pawh  sanction a nih tawh  leh reilote ah hna thawh tan theih a beisei thu  te he building hi Thalai leh Kuthnathawktute tan thil tangkai tak a nih tur thu a sawi bawk. Electric Veng  chhunga zirna school hrang hrang sak that ngai pawh NABARD sum hmanga sak that a nih tur thu  leh, "Thawhho na tha leh inlungrualna  hian hmasawnna  nasa tak min thlen thin a ni," tiin theihtawp chhuaha khawtlang leh ram tana hma la ho zel turin khawtlang hruaitute a sawm a. Hotute duhsakna changa MYC Chairman a a awm chu lawmawm a tih thu  leh thalaite khawvel ti eng tura theihtawp chhuah a tum thu leh hmachhawp tam tak an neih thu a sawi bawk.

He hun kaihhruaitu LH Lianzama Vice President Br. YMA Electric veng chuan Bialtu MLA in an veng leh khawtlang tana hna a thawh sak hrang hrang te leh hmasawnna tam tak an hmuh te sawiin Veng chhunga NGO's hrang hrang aiawhin lawmthu sawina an nei a. MUP ten Excursion an kal na tur  ngaihtuah sak  an ni te chu thinlung tak a an lawmthu an sawi bawk.