Vawiin khan NEDP bultuma Information and Public Relations Department (I&PR) buatsaih Press Study Tour nei tura lokal MJA Serchhip District member-te chuan Champhai District chhunga sawrkar hmalakna hrang hrangte leh pipute sulhnu pawimawhte tlawh kualin zirchianna an nei.

MJA Serchhip District member-te hian tukin zing khan Chhangphut Field leh Govt. Champhai College-te an tlawh a. Hemi hnu hian World Bank sum hmanga Indo-Myanmar Road siam mekte, Composite Land Custom Station, Department of Trade and Commerce, Zokhawthara mite tlawhin Indo-Myanmar Trade zirchianna an nei a. Hemi bakah hian pipute sulhnu pawimawh tak Rih Dil leh Hringlang tlangte an tlawh tel bawk a ni.

Press Study Tour team-te hian nimin leh nimin piah lamah  Khawbung RD Block huam chhunga pipu sulhnu pawimawh tak tak Thasiama se no neihna, Fiara tui, Kawtchhuah ropui, Kungawrhi Puk, Lungkeiphawtial, Chhura chirawt lung, Khuavang lam thuam thum, Lianchhiari lunglen tlang leh Hla kungpui mualte an tlawh a. Heng an fan kualnaah hian mithiamte leh khawtual mite puihnain zirchianna leh zir hona hun hlawk thlak tak an hmang a ni.

Pu K.Saitluanga, DIPRO Serchhip kaihhruaina hnuaia local NEDP Press study Tour member-te  chuan sawrkar hmalaknaa Press Study Tour leh Project Site Visit neih a ni chu hlawkthlak an tiin hemi programme buatsaihtu sawrkar hnenah lawmthu an sawi a. An kalna hmun apianga khawtlang hruaitute lo dawnsawn danah lawmthu an sawi bawk a ni.

Zanin hian Press mite pualin Champhai District Bawrhsap charge la mektu Pi Lalsangpuii Hmar, Addl DC chuan inkawmhona leh zanriah a buatsaih a ni. NEDP Press Study Tour team-te hian naktuk lamah Mizo Historical Village, Chawngtlai tlawh lehin hemi hnu hian Serchhip lam panin an let leh dawn a ni.