Vawiin chawhnu khan Excise & Narcotic Minister Pu R.Lalzirliana kaihruaina hnuaiah  State Prohibition Council(SPC)chu Aijal Club-ah an thukhawm.  SPC Meetingah hian  zu in khawtlang a nghawng dan zirchiangtu, The Study Group of MLPC Act 2014 chu pharh a ni a. Zirchianna statistics te chu uluk taka sawiho a nih bakah he Study Group in hmalak chhunzawm theih dan kawng kawng chi thum a chhawpchhuah pawh sawiho a nih leh a. He mi hnu hian SPC chuan rawtna siam in  sawrkar hnena thehlut tura  hmalak tha a ti a ni. 

Meeting kaihruaitu,  Excise & Narcotic Minister Pu R.Lalzirliana chuan MLPC Act 2014 Mizoram in a hman tak hnua   khawtlang nun bakah  sum leh pai dinhmun Zu in a nghawng dan chipchiar taka zir turin The Study Group of MLPC Act 2014 chu March 10, 2017 khan din a nih thu a sawi a. Zirchianna chu scientific based research a nih thu te,  Mizoram chhung bik zirchianna  atan hian khawvel ram danga an tih dan te thleng  pawhin  hmaih lova  zir leh rawn tel a ni a, a rintlak in Mizoram tan pawh Study Group of MLPC Act 2014 in lehkhabu a siam chu a la hlu chho telh telh dawn a ni a ti a. He zirchianna atana data lakkhawm te chu India rama rilru lam zirtu lar, Dr. Vivek Benegal, Professor of Psychiatry, Centre for Addiction Medicine, NIMHANS, Bangalore leh Prof. NVR Jyoti Kumar, Dean of SEMIS,Mizoram University te bihchian tir leh vek a ni a, an ni pawh in Zirchianna rintlak takah an pawm a ni a ti.

The Study Group of MLPC Act 2014 ah hian Member cum Convener Pu Dominic Lalhmangaiha bakah member dangte - Lt.Col(Rtd) Lalramhluna, Dr.Laldinliana Varte(MZU),  Dr.K. Lalbiakzuala( Surgeon), Dr. C. Lalhrekima, Pu Lalbiakzuala(CYMA aiawh)  leh Pu  Vanlalrema Vantawl ( MJA aiawh) te an awm a. Vawiin SPC meeting-ah hian  Study Group aiawhin Dr. Laldinliana Varte, Principle Investigator ni bawk chuan MLPC Study Group Report  chhunga inziak leh a awmzia te a sawifiah a ni. 

MLPC Study Group Report ah hian zirchianna chu Sector 10 hnuaiah Costs leh Benefits  anga chhut leh hrilhfiah a ni a. Costs hian Zu avanga tharum thawhna, damloh natna a thlen, a hun hmaa thihna, khawsakdan tlakhniamna, hriselna a tihchhiatna, sum  senso a tih punna, police, END leh Judicial kaihhnawiha senso a siam tam zat, accident thlen te, Ruihlo ngai a tihpunna, tlawmngai pawlte leh kohhran mite tha leh zung sen zat leh thildang te a huam a. Benefits hnuaiah hian Zu avanga zu in mite hlimna suma chantir, sumdawnna atan remchanna a siam te, eizawnna a siam te, natna benvawn thenkhat tana zu tangkaina te leh ruihlo dang tih loh phahna atana zu thatna lam te chhut a ni thung a ni.  Zirchianna Table hnuaia sector 10  te chu - Consumer, Retail, Tax, Healthcare, Education, Police & Justice, Public Authority, Church and Community, Others in society( members of family/ victims) leh other externalities te a ni.

MLPC Study Group chuan an data lakkhawm  atanga an hmuhdan behchhan in Zu chungchanga hmalak zel theih dan tur kawng thum  MLPC Study Group Report-ah hian a telh bawk a, chung te chu Option 1 : Prohibition, Option 2 : Partial/ Controlled Prohibition leh Option 3 :  Free sale te a ni.